გაწუხებთ უძილობა, მოხრილი მხრები, სახსრების ტკივილი, გაძნელებული სუნთქვა? გინდათ აიმაღლოთ იმუნიტეტი, გაიუმჯობესოთ საჭმლის მონელების პროცესი და დაივიწყოთ თავის ტკივილები? - დაიწყეთ დილა მარტივი იოგით.

ბალასანა (ბავშვის პოზა)

დადექით მუხლებზე ისე, რომ საჯდომით ფეხის ქუსლებს ეხებოდეთ. მუხლები მხრების სიგანაზე გასწიეთ, გამართული ხელებით იატაკს დაეყრდენით და თავი წინ დახარეთ ისე, რომ შუბლით იატაკს შეეხოთ. გაჩერდით ამ პოზაში და ათჯერ ჩაისუნთქეთ და ამოისუნთქეთ.

შედეგი: ეს პოზა დადებითად მოქმედებს ნერვულ სისტემაზე. შველის ქრონიკულ დაღლილობას და სტრესის და დაძაბულობის შემდეგ განმუხტვაში დაგეხმარებათ.

მარჯარიასანა (კატის პოზა)

იდეალური პოზაა დამწყებთათვის. დადექით ოთხზე. არ არის აუცილებელი ფეხები ერთად დადგათ, მაგრამ მხრებზე ფართოდ არ გაშალოთ. ხელები იატაკის პერპენდიკულარულად უნდა მოათავსოთ ისე, რომ მუხლები და ხელის მტევნები ერთ ხაზზე იყოს. მაქსიმალურად ამოზნიქეთ ზურგი, ამ დროს თავი აწეული გაქვთ და მაღლა იყურებით. შემდეგ ზურგი მოამრგვალეთ, თავი დახარეთ ისე, რომ ფეხებს უყუროთ. მთელი ამ როის განმავლობაში თეძოები საწყის მდგომარეობაში რჩება.
მნიშვნელოვანია გახსოვდეთ, რომ ზურგის აზნექისას უნდა ჩაისუნთქოთ, მომრგვალებისას კი - ამოისუნთქოთ. თითოეულ პოზაში გაჩერდით იმდენ ხანს, რომ 5-7-ჯერ ამოისუნთქოთ და ჩაისუნთქოთ.

შედეგი: ამცირებს ტკივილს კისრისა და გულმკერდის არეში. ერთგვარ მასაჟს უკეთებს შინაგან ორგანოებს, აუმჯობესებს მუცლის ღრუში განთავსებული ორგანოების მუშაობას. დადებითად მოქმედებს მუცლის პრესზე. ახდენს ენერგიის აკუმულირებას, რისი წყალობითაც ორგანიზმი ადვილად უმკლავდება სტრესს.

ადხო მუკხა შვანასანა ( ძაღლი პირქვე)

დადექით ოთხზე. ხელები და ფეხები მხრების სიგანეზე მოათავსეთ, წელი ჩაზნიქეთ, ამოისუნთქეთ და აიწიეთ მაღლა ისე, რომ ხელები, კისერი და ზურგი გაჭიმული იყოს - პოზა მთლიანობაში მთას უნდა მოგვაგონებდეს. ხელის მტევნებითა და ფეხის ტერფებით იატაკს არ მოსცილდეთ. მუხლები გამართულად გეჭიროთ. ყურადღება მიაქციეთ - ფეხის ტერფები მჭიდროდ უნდა ეყრდნობოდეს იატაკს, თავიდან ეს გაგიჭირდებათ (როგორც ფოტოზე), მაგრამ დროთა განმავლობაში ყველაფერი გამოგივათ. ცოტა ხნით გაჩერდით ამ პოზაში და თანდათან ბავშვის პოზაში გადადით.

შედეგი: აღადგენს ენერგიას, ხსნის დაღლილობას, სისხლის ძლიერი ნაკადის მიწოდებით, აახლებს თავის ტვინის უჯრედებს და აუმჯობესებს სახის კანის ფერს, აუმჯობესებს საჭმლის მონელების პროცესს, ამაგრებს ფეხის კუნთებს. სასარგებლოა ართრიტისა და ბრტყელტერფიანობის დროს.

უტანასანა (ძლიერი გადახრა წინ)

ღრმად ჩაისუნთქეთ ხელები თავზემოთ ასწიეთ, კუნთები მოადუნეთ, ხერხემალი გამართეთ, ღრმად ამოისუნთქეთ და რაც შეგიძლიათ წინ გადაიხარეთ ისე, თითქოს ორად გაკეცვას ცდილობდეთ. ხელებით შეეხეთ იატაკს, დასაწყისში ეს ალბათ გაგიჭირდებათ, ამიტომ შეგიძლიათ ხელები კოჭებს მოკიდოთ. აუცილებლად გააკონტროლეთ მუხლები, ისინი, როგორც ხერხემალი, გამართული უნდა იყოს. რამდენიმე წამით სუნთქვა შეიკარით, შემდეგ ამოისუნთქეთ და საწყის მდგომარეობას დაუბრუნდით.

შედეგი: ეს ვარჯიში ენერგიით ამარაგებს სხეულის ქვედა ნაწილს. "აგრილებს" ტვინს. ხსნის ფიზიკურ დაღლილობას. აქვეიტებს მადას. დადებითად მოქმედებს სასქესო ორგანოებზე, კუჭქვეშა ჯირკვალზე, შარდის ბუშტსა და ხერხემალზე.
აღმოსავლური ტანვარჯიში ორგანიზმს გაჯანსაღებაში ეხმარება, ახდენს ჩვენი სხეულისა და სულიერი სამყაროს რეზერვების მობილიზებას, გვეხმარება ფიზიკურ და ფსიქოლოგიურ შესაძლებლობებს შორის ჰარმონიული წონასწორობის მიღწევაში.

სოფიო ბულაური