ალბათ ჩაგიხედავთ სარკეში და გიკითხავთ საკუთარი თავისთვის: „სიმპათიური ვარ, სანდომიანი ღიმილი მაქვს, ჭკუა არ მაკლია, ადამიანებთან ურთიერთობაც მეხერხება. მაშინ რატომ არ მოვეწონე იმ გოგონას?" დავიწყოთ იქიდან, რომ შეიძლება მსოფლიოში აღიარებული სექსსიმბოლოებიც ( ბრედ პიტი, ლეონარდო დიკაპრიო ან ჯონი დეპი) კი არ მოეწონოს რომელიმე ქალს. გემოვნება ინდივიდუალურია, ადამიანები თავისებურად აღიქვამენ სილამაზეს. თუ ეს მიზეზი არაფერ შუაშია, გთავაზობთ 4 შეცდომას, რომელსაც ქალის გაცნობისას უშვებთ და ქალსაც თქვენთან ურთიერთობის გაგრძელების სურვილს უქრობთ:

1. საუბრობთ მხოლოდ საკუთარ თავზე

გასაგებია, რომ ქალს საკუთარი თავი საუკეთესო კუთხით გინდათ დაანახვოთ, მაგრამ არ გადაამლაშოთ. თქვენ ალბათ ერთი სული გაქვთ უამბოთ, რომ გასულ თვეს პრემიით დაგაჯილდოვეს, როგორც საუკეთესო თანამშრომელი. შესაძლოა, გსურთ გააგებინოთ, რომ ცხოვრების ჯანმრთელი წესით ცხოვრობთ, არ ეწევით და არ სვამთ. გახსოვდეთ, საჭირო არ არის ქალს საკუთარ თავზე ერთბაშად მაქსიმალური ინფორმაცია მიაწოდოთ. იყავით ცოტა იდუმალი. დაუსვით შეკითხვები გოგონას და აგრძნობინეთ რომ თქვენთვის საინტერესოა.

2. ეხებით მას

შეიძლება ფიქრობთ, რომ თქვენ წინ მდგარი ქალი სწორედაც შეხებისთვისაა შექმნილი, მაგრამ ხელებს თავისუფლად მოძრაობის საშუალება არ უნდა მისცეთ. თუ ქალს კარგად არ იცნობთ და მისი შეხებისკენ მიისწრაფით, დიდ შეცდომას უშვებთ. პირველ რიგში, ამ ჟესტით აგრძნობინებთ რომ პატივს არ სცემთ.

3. გადამეტებულ ყურადღებას აქცევთ მის მეგობარს

დაინახეთ, თქვენი ოცნების ქალი და ძლივს მოიკრიბეთ გამბედაობა რომ მიახლოვებოდით... ის თქვენ წინაშე დგას და ბრწყინავს. როგორ უნდა დაელაპარაკოთ? თითქოს ბედმა გაგიღიმა, მას გვერდით მეგობარი მოჰყვება. ნაცვლად იმისა რომ ოცნების ქალს გაესაუბროთ, მის მეგობართან აბამთ დიალოგს. ამ დროს გოგონებს ექმნებათ შთაბეჭდილება, რომ ის მოგწონთ, ვისაც პირველად გამოელაპარაკეთ.

4. სვამთ გამბედაობის მოსაკრებად

დალევისას ყველას ეჩვენება, რომ იცის როდის უნდა გაჩერდეს, სინამდვილეში მამაკაცების დიდი ნაწილი ისე თვრება ფეხზე ძლივს დგას. დამიჯერეთ, თუ ქალი ასეთ მდგომარეობაში დაგინახავთ, იფიქრებს, რომ ლოთი ხართ და გაგერიდებათ.

რადა მახარაძე