რამდენიმე დღის წინ მიხეილ ცაგარელმა 2016 წლის პოლიტიკურ ასტროლოგიურ პროგნოზებზე პრესკონფერენცია გამართა. ცაგარელი ღიად აცხადებდა, რომ 2016 წელი პოლიტიკურად განუსაზღვრელი მოულოდნელობებით იქნება სავსე:

"ამას მოიტანს გიჟი გადარეული მაიმუნი, ეს წელიწადი გამოავლენს ძალიან ბევრ მატყუარა პოლიტიკოსს, რომლებიც გამოაშკარავდებიან წლის მეორე ნახევარში, კარგად გამოჩნდება ვინ ვის ატყუებს, რატომ და რა ფორმით.

მოსალოდნელია რადიკალური ცვლილებები, ახალი პოლიტიკოსების გამოჩენა, რომლებიც უკვე ემზადებიან პოლიტიკაში ჩასართავად ქვეყნის განვითარების საინტერესო დოქტრინებით. 2016 წელს რადიკალურად შეიცვლება ქვეყნის განვითარების მიმართულებაც."

ასტროლოგის მტკიცებით, მოსალოდნელია სერიოზული კონფლიქტები სამთავრობო სტრუქტურებში და ცალკეულ პარტიებში, მითუმეტეს, საპარლამენტო არჩევნების ფონზე, ცვლილებები იქნება საკანონმდებლო ორგანოში.

გაირკვა, რომ ცაგარელის წინასწარმეტყველებამ სულ რამდენიმე დღით დაასწრო ქართულ პოლიტიკაში მიმდინარე პროცესებს. მოულოდნელად მთავრობა პრეიმერ-მინისტრის მოსალოდნელ გადადგომაზე ალაპარაკდა.

უმრავლესობის ერთი ნაწილი ღიად აღიარებს, რომ ღარიბაშვილის გადადგომაზე საუბარი იყო, მეორე ნაწილი კი ამას უბრალოდ ჭორაობად მიიჩნევს.

სალომე დადიანი