ვაშინგტონის შტატის პოლიცია დაინტერესდა ინტერნეტში ატვირთული ვიდეოთი, სადაც 16 წლის ჯორდან ხოლგერსონი, მოულტონის ჩანჩქერთან, 18 მეტრის სიმაღლეზე გადებულ ხიდზე დგას. გოგონა დიდხანს ვერ დაითანხმეს, გადამხტარიყო მდინარეში 18 მეტრის სიმაღლიდან.

მოულოდნელად, მეგობარმა გოგომ ხელი ჰკრა ჯორდანს და გოგონა დაუგეგმავი ჩავარდნის გამო, მუცლით დაეცა წყალზე, რის შედეგადაც მრავლობითი დაზიანება მიიღო.

ვიდეო ერთ-ერთმა მეგობარმა გოგომ გადაიღო. იგი ამგვარ დასასრულს, ბუნებრივია, არ ელოდა, თუმცა, მისი ატვირთვით აშკარა პრობლემები გაიჩინა.

ინციდენტი, "TDN.com"-ის ცნობით, 7 აგვისტოს მოხდა, მდინარე ლიუისზე ვაშინგტონის შტატის კლარკის ოლქში. მოულტონის ჩანჩქერთან 18 მეტრის სიმაღლეზე გადებული ხიდი მუდმივად იზიდავს ექსტრემის მოყვარულ ადამიანებს, თუმცა, 16 წლის გოგონას ნამდვილად არ გაუმართლა, როცა დიდი ხნის ყოყმანის შემდეგ, დაქალმა  ხელი ჰკრა და მდინარეში გადავარდა.

გოგონამ ძლივს შეძლო, დამოუკიდებლად ამოსულიყო მდინარიდან, ის საშინელი ტკივილებით მიიყვანეს უახლოეს კლინიკაში, სადაც აღმოჩნდა, რომ 16 წლის მოზარდს ხუთი ნეკნი ჰქონდა მოტეხილი, გახეთქილი ჰქონდა ელენთა და დაზიანებული ჰქონდა ფილტვები. სასწრაფოდ მოხდა ქირურგიული ჩარევა.

ამჟამად გოგონას სიცოცხლეს საფრთხე არ ემუქრება, თუმცა, მის სრულად გამოჯანმრთელებას, ექიმების დასკვნით, რამდენიმე თვე დასჭირდება.

გოგონას დედამ პოლიციის დეპარტამენტში საჩივარი შეიტანა და გამოძიების დაწყება მოითხოვა.
პოლიციამ საჩივრის და ვიდეოს საფუძველზე დაიწყო მოკვლევა.

შარშან აღნიშნული ხიდიდან მდინარეში გადახტომის შედეგად 47 წლის ტურისტმა ვანკუვერიდან მძიმე დაზიანებები მიიღო.

იხილეთ ვიდეო