არაფერი ვნებს კეთილდღეობას ისე, როგორც მღელვარება და შფოთი. ხდება ხოლმე, თითქოს ყველაფერი კარგადაა, მაგრამ უცებ ჩნდება მიზეზი მღელვარებისთვის. ნებისმიერ შემთხვევაში, კვირა საღამოს სულ რაღაც თხუთმეტწუთიანი რიტუალი დაგეხმარებათ, მთელი კვირა მაქსიმალურად მშვიდად გაატაროთ.

ყველაფერი ქაღალდზე გადმოანთხიეთ
გამონახეთ 15 წუთი იმისთვის, რომ მომდევნო კვირისთვის ენერგია მოიკრიბოთ, დამშვიდდეთ, პოზიტიურად განეწყოთ. ამისთვის, თქვენს ნოუთბუქთან ან სუფთა ფურცელთან ერთად განმარტოვდით, და გვერდის ზედა ნაწილში დაწერეთ სათაური „ჩემი შფოთი და წუხილი“. შემდეგ კი ფურცელზე გადმოანთხიეთ, რაც გაწუხებთ. ეს საშუალებას მოგცემთ, ობიექტურად შეაფასოთ თქვენი პრობლემები. დაწერეთ ყველაფერი, რაც თავში მოგივათ, ყოველგვარი ცენზურის გარეშე.

მაგალითად, შეგიძლიათ დაწეროთ შემდეგი:
ვერასდროს შევძლებ ჩემი ელექტრონული ფოსტის მოწესრიგებას.
სამსახურში დოკუმენტების მოწესრიგებას თავს ვერ გავართმევ.
მეჩვენება, რომ საკუთარ ქალიშვილს არ ვუყვარვარ.
ისე გავსუქდი, რომ საყვარელი ჯინსის შარვალი არ მეტევა.

ჩემი შვილი, ალბათ, ვერ მოხვდება იმ სასწავლებელში, რომელზეც ოცნებობს და ვშიშობ, ეს ძალიან ატკენს გულს. ღმერთმა ქნას, გადაიტანოს ეს სტრესი და დეპრესიაში არ ჩავარდეს.

ამის შემდეგ დაფიქრდით, როგორ გინდათ განვითარდეს მოვლენები. ამისთვის შემდეგ გვერდზე დაწერეთ სათაური „მოვლენების ბედნიერი განვითარება“ და თარიღი - როგორც წესი, ის, რომელიც ერთი კვირის შემდეგ დადგება.

შეადგინეთ მოქმედების გეგმა
გადაშალეთ ახალი გვერდი და დაწერეთ სათაური „რას გავაკეთებ“. იყავით რეალისტი და დაწერეთ მხოლოდ კონკრეტული ზომები, რომელთა მიღებასაც უახლოესი შვიდი დღის განმავლობაში შეეცდებით. უნდა დაწეროთ მხოლოდ ის, რის გაკეთებასაც ნამდვილად შეძლებთ.

მაგალითად, იმას ნუ კი დაწერთ, რომ მომავალ კვირაში ერთ კილოგრამს დაიკლებთ, დაწერეთ, რომ შეამცირებთ ნახშირწყლებისა და ალკოჰოლის მოხმარებას, გააკონტროლებთ კალორიებს.
გვერდზე გადადეთ საკუთარი საზრუნავი.
მას შემდეგ, რაც სამოქმედო გეგმა მზად გექნებათ, ფურცელი საწერ მაგიდასთან კედელზე მიამაგრეთ. იქვე ჩამოკიდეთ ფურცელი, სათაურით „მოვლენების ბედნიერი განვითარება“. მის ქვეშ მიაწერეთ „გმადლობ“, ამას იმისთვის ვაკეთებთ, რომ მაქსიმალურად იგრძნოთ მადლიერების გრძობა, თქვენი სურვილების ასრულებისთვის.
რაც შეეხება ფურცელს „ჩემი შფოთი და წუხილი“, ის, უბრალოდ, ნაგვის ყუთში მოისროლეთ.
როგორც ხედავთ, საკუთარ თავზე მხოლოდ ცოტაოდენი მუშაობაა საჭირო, რომ ჰარმონიასა და სიმშვიდეს მიაღწიოთ.
შეიძლება მხოლოდ ერთი რამ ვთქვათ - კვირა საღამოს რიტუალის შემდეგ, მთელი კვირა თავს უკეთ იგრძნობთ.