ქუთაისის ახალგაზრდული ცენტრიდან 19 წლის ანზორ სვიანიძე გარიცხეს. აღნიშნული გადაწყვეტილება მედიასკოლის ხელმძღვანელობამ სტუდენტის მიერ დაწერილი პოსტის გამო მიიღო. მან სოციალურ ქსელში პოსტი დაწერა, რომელშიც სექსუალური უმცირესობების შესახებ იხუმრა და ამის გამო სასწავლებლის გარეშე დარჩა.
„რეიტინგი“ ანზორ სვიანიძეს დაუკავშირდა:

- სექსუალურ უმცირესობაზე დავწერე სამი პოსტი და ერთ-ერთ პოსტში ირონიული კითხვა დავსვი, რამაც მედიასკოლის ხელმძღვანელი, ქალბატონი ნატალია გააღიზიანა და სკოლიდან გამრიცხეს. „ფეისბუქით“ შევიტყვე სკოლიდან გარიცხვის შესახებ, ოფიციალურად არავის მოუმართავს.

როგორც მარიტა შესვეს ცხენზე და ტალახი ესროლეს, ზუსტად ამ დღეში ჩამაგდო ჩემი პოსტის გამო სკოლის დირექტორმა და მისმა მხარდამჭერებმა. სოციალურ ქსელში მწერდნენ თავი უნდა მოიკლაო. ვერ ვხვდები თავი რატომ უნდა მოვიკლა? იმიტომ რომ სექსუალურ უმცირესობებს მხარს არ ვუჭერ? მე ყველანაირ ძალადობას ვგმობ, მაგრამ წინააღმდეგი ვარ ერთსქესიანთა ქორწინების, ეკლესიაც კრძალავს ამას. სექსუალური უმცირესობების წარმომადგენლები ყოველთვის არსებობდნენ, მათ შორის ცნობილი ადამიანები, მაგრამ ისინი ასე არ იქცეოდნენ. ვისაც როგორ უნდა ისე იცხოვროს, მთავარია, ჩვენ ნუ შეგვიქმნიან ამით დისკომფორტს. ამბობენ, რომ ისინი სექსუალური უმცირესობის წარმომადგენლები არიან, ნამდვილად ასეა, მაგრამ თუ დავუკვირდებით ჩვენზე მეტ უფლებებს ითხოვენ. სტატუსების წერაც კი გვეკრძალება მათი უფლებების გამო.

- სასამართლოში ჩივილს აპირებთ?
- რა თქმა უნდა, მე ორი წელია, ვსწავლობ მედია სკოლაში. მეორე წელს სწავლა იმიტომ გავაგრძელე, რომ სამსახურში არ ამიყვანეს და არ მინდოდა რეჟიმიდან ამოვარდნილი ვყოფილიყავი. სასამართლოში ვიჩივლებ და ვიცი, ბევრი ადამიანი დამიდგება გვერდით.
როგორც ჩვენთან საუბარში მედიასკოლის ხელმძღვანელმა ნატალია პატარიძემ განაცხადა, მათთვის სიძულვილის ენით საუბარი მიუღებელია.

- რატომ გაათავისუფლეთ სკოლიდან ანზორ სვიანიძე?
- შიდაგანაწესის საფუძველზე გავათავისუფლეთ ანზორ სვიანიძე სკოლიდან და არა მისი დამოკიდებულების გამო უმცირესობების მიმართ. ჩვენ ვებრძვით სიძულვილის ენის ტირაჟირებას. ჩვენ ვართ კერძო სტრუქტურა და თუ მოსწავლე სიძულვილის ენით საუბრობს, მიუღებლად მიგვაჩნია.