მაშ ასე, ბევრი იმხისრულეთ, ბევრი დალიეთ და მეორე დილით თავი გისკდებათ, მცირედი ხმაურიც კი აუტანელ ტკივილს გაყენებთ, წყურვილი გკლავთ და გინდათ უნიტაზს "ჩაეხუტოთ" - ეს ნაბახუსევის ჩვეული სიმპტომებია და თუ გინდათ იოლად გადარჩეთ, გამოიყენეთ შემოთავაზებული რეცეპტები.

კვერცხის კოქტეილი

ორი კვერცხის გული და სამი სადილის კოვზი შაქარი კარგად ათქვიფეთ ერთმანეთში და მიღებული მასა ჩაასხით ერთ ჭიქა ახალგამოწურულ ფორთოხლის წვენში. კარგად აურიეთ და დაამატეთ ნახევარი ჭიქა ნაღები.

კომბოსტოს მწნილის წვენი ტომატის წვენთან ერთად

ყველამ იცის, რომ მწნილის წვენი კარგად შველის ნაბახუსევს. საუკეთესო საშუალებაა კომბოსტოს მწნილის წვენისა და ტომატის წვენის ნაზავი - ერთმანეთში უნდა შეურიოთ ნახევარი ჭიქა კომბოსტოს მწნილის წვენი და ერთი ჭიქა სქელი ტომატის წვენი. სურვილისამებრ, შეგიძლიათ ამ სასმელში ცოტაოდენი სტაფილოს ან ვაშლის წვენი ჩაამატოთ.

ციტრუსის წვენი

გამოწურეთ ნებისმიერი ციტრუსის წვენი და დაამატეთ ცოტაოდენი წყალი ან ნეიტრალური წვენი. სურვილისამებრ, შეგიძლიათ ერთი-ორი კვერცხის გულიც დაამატოთ.

კეფირი და მწვანილი

ნაკლებცხიმიან კეფირს დაუმატეთ წვრილად დაჭრილი მწვანილი - კამა, ოხრახუში ან ქინძი. ასევე, მარილი გემოვნების მიხედვით და დალიეთ. თუ სასმელი სქელი გამოგივიდათ, შეგიძლიათ წყლით გააზავოთ.

სამკურნალო სასმელების გარდა, ნაბახუსევზე ბევრი წყალიც უნდა დალიოთ.

სოფიო ბულაური