პუტკუნა ბავშვები, მართალია, ძალიან საყვარლები არიან, მაგრამ არ უნდა დაგვავიწყდეს, რომ სიმსუქნე შეიძლება მათი ჯანმრთელობისთვის საზიანო აღმოჩნდეს. სამწუხაროდ, ბავშვების არაჯანსაღი სიმსუქნის პრობლემა მთელ მსოფლიოში სულ უფრო აქტუალური ხდება. ამის მიზეზად ასახელებენ უკიდურესად გაუარესებულ ეკოლოგიას, ცუდ ქიმიურ საკვებს და რა თქმა უნდა, მშობლების უყურადღებობას, რაც ერთი შეხედვით, შეიძლება მზრუნველობას ჰგავდეს. აი, შეცდომები, რომლებსაც მშობლები უშვებენ.

• ზედმეტი ჭამა - რატომ აძალებთ ბავშვს შეჭამოს მთელი თეფში საჭმელი, თუ არ უნდა? არ უნდა? არ დააძალოთ! თუ ბავშვი ძალიან უჭმელია, უბრალოდ, ალტერნატიულ ხერხს მიმართეთ - აჭამეთ ცოტ-ცოტა და ხშირ-ხშირად.

• გაზიანი სასმელები - რა საჭიროა?! ხომ არსებობს კომპოტები, ხილ-ბოსტნეულის წვენები, წყალი, რძე! საბედნიეროდ, საქართველოში წლის ნებისმიერ დროს შეიძლება ნატურალური ხილ-ბოსტნეულისა და ჩირებისაგან წვენებისა და კომპოტების მომზადება. მოარიდეთ ბავშვები კოკა-კოლას, სპრაიტსა და პეპსის, ნურც მინერალურ სასმელს შეაჩვევთ. ნებისმიერი ტკბილი გაზიანი სასმელი, გარდა იმისა, რომ უამრავ კალორიას შეიცავს, ძლიერი ალერგენიცაა.

• ტკბილეული - არ ღირს ბავშვის ტკბილეულით განებივრება. ძალიან ადვილია მისცე კანფეტი და გააჩუმო, მაგრამ ისწავლეთ ბავშვის რაციონის გაკონტროლება.

• ნაკლებმოძრავი ცხოვრების წესი - კომფორტი არა მარტო უფროსებს, ბავშვებსაც ძალიან იზიდავთ. ბავშვები თანდათან ზარმაცდებიან. დღევანდელი ბავშვები სულ უფრო იშვიათად თამაშობენ ეზოში, ძირითადად კომპიუტერებთან სხედან. ეზოში თუ ჩადიან, იქაც მობილურებს ჩასცქერიან. თუ საშუალება გაქვთ, ჯობს, ბავშვი სპორტულ წრეზე მიიყვანოთ.

• რეკლამა - ბავშვები ხშირად ითხოვენ რეკლამაში ნანახი შოკოლადისა და სხვა ტკბილეულის ყიდვას. გახსოვდეთ - პოპულარული არ ნიშნავს სასარგებლოს! ამიტომაც აუხსენით, რომ ყველაფრის ჭამა არ შეიძლება და არ დაუთმოთ ამ საკითხში.

სოფიო ბულაური