მართალია, დიეტის დაცვა არც ისე ადვილია და უამრავ სირთულეს უკავშირდება, მაგრამ თუ ზომიერად მიირთმევთ და თან ერთ-ორ მარტივ ხრიკსაც მიმართავთ, სასურველი წონის დაბრუნებასა და შენარჩუნებას აუცილებლად შეძლებთ.

თუ ზედმეტ წონას ებრძვით, ჭამის წინ ერთი ჭიქა წყალი ან ტომატის წვენი დალიეთ, ეს დანაყრების შეგრძნებას გაგიჩენთ.

გაითვალისწინეთ, რომ წყალიც და წვენიც ერთბაშად კი არ უნდა დალიოთ, არამედ ყლუპებით.

თუკი სადილამდე დიდი დროა დარჩენილი და ძალიან მოგშივდათ, მიმართეთ შემდეგ მეთოდს: დაჭერით ერთი ვაშლი მცირე ნაჭრებად და აუჩქარებლად მიირთვით.

მას შეგიძლიათ დააყოლოთ ყველის პატარა ნაჭერი, ოღონდ დიდხანს ღეჭეთ და მცირე ულუფებით ჭამეთ. ვაშლსაც და ყველსაც ცხელი მწვანე ჩაი დააყოლეთ. ვაშლი იმ შემთხვევაშიც გამოგადგებათ, თუკი სადილის შემდეგ დანაყრების შეგრძნება არ გაგიჩნდათ.

გაითვალისწინეთ, საკვები ნელ-ნელა უნდა ღეჭოთ, რომ ორგანიზმმა დანაყრების პროცესი დროულად აღიქვას და ზედმეტის ჭამა არ მოგიხდეთ.

სოფიო ბულაური