სახლთან დავხვდი, დალაპარაკება მინდოდა, მაგრამ უხეშად მომიშორა მე და სესილი ათი წლის წინ დავქორწინდით და ერთად სულ რამდენიმე თვე ვიცხოვრეთ. მეუღლეს ბავშვის გაჩენა არ უნდოდა, რადგან ფიქრობდა, რომ ტანი გაუფუჭდებოდა. მდიდარ ოჯახში გაიზარდა და ჩემი სიღარიბე იმდენად არ მოსწონდა, რომ მთელი დღეები დედამისთან იჯდა და შინ დასაძინებლად მოდიოდა.

სკანდალის გარეშე დავშორდით და მალე ისიც დამავიწყდა, რომ ცოლი მყავდა. ერთხელ საერთო ნაცნობი შემხვდა ქუჩაში და მითხრა, რომ სესილი ვიღაც მილიონერზე გათხოვდა და თავს ბედნიერად გრძნობდა.

ექვსი თვის წინ ყოფილმა მეუღლემ დამირეკა და შეხვედრა მთხოვა. მთელი ღამე ვერ დავიძინე, ვერაფრით წარმოვიდგინე, რა უნდოდა ან საიდან გავახსენდი. შეხვედრისას მითხრა, რომ მეუღლე უშვილო აღმოჩნდა. თვითონ კიდევ ბავშვის გასაჩენად მზად იყო და უნდოდა შვილი ჩემგან ჰყოლოდა.

თავი ვერ შევიკავე და რამდენიმე დღე მასთან ერთად სასტუმროში გა ვატარე. ამის შემდეგ სესილი ისევ გაქრა. ტელეფონი მუდამ გამორთული ჰქონდა.

ორი კვირაა, რაც გავიგე, რომ ფეხმძიმედაა და ჩემგან შვილს ელოდება. სახლთან დავხვდი, დალაპარაკება მინდოდა, მაგრამ უხეშად მომიშორა. მითხრა, იქ მისვლას კიდევ თუ გავბედავდი, მიჩივლებდა. ვიცი, ჩემი ბრალია, მის ავანტიურას არ უნდა ავყოლოდი, მაგრამ გამოსავალს ვერ ვხედავ. არ მინდა, ჩემი შვილი სხვას ეძახდეს მამას.

ჟურნალი „რეიტინგი“