ბოლო პერიოდში თბილისში რამდენიმე რუსი ვარსკვლავის ჩამოსვლის შესახებ გვაცნობეს, თუმცა ზემფირას კონცერტები ჩაიშალა და ამას დიდი სკანდალი მოჰყვა, მოგვიანებით იგეგმებოდა მიხაილ შუფუტინსკის, ანასტასია ვოლოჩკოვასა და ირინა ალეგროვას კონცერტები, რომლებიც ასევე არ გამართულა. ზემფირას კონცერტებზე საზოგადოებამ, ასე თუ ისე, ინფორმაცია მიიღო და ბევრი ურთიერთბრალდება მოისმინა ორგანიზატორებისა და ზემფირას მხარეებიდან, რაც შეეხება
პროდიუსერი ეკა ჩიტაშვილი დიდი ხანია, საზღვარგარეთ მუშაობს შოუბიზნესის სფეროში, აკეთებს მუსიკალურ კონკურსებს, აქვს საპროდიუსერო კომპანია, თანამშრომლობს არტისტებთან, უზრუნველყოფს კონცერტების მოწყობას და ა.შ. ეკა მოლდავეთში, კიშინიოვში ცხოვრობს. მას ინტერნეტით დავუკავშირდით. ეკამ ჩვენთან საუბარი იმით დაიწყო, რომ გაგვიმხილა, ზემოხსენებული ჯგუფის წარმომადგენლები მასაც დაუკავშირდნენ და როგორც პროდიუსერს, ამ სქემაში ჩართვა და ფულის შოვნა შესთავაზეს, თუმცა ეკასგან კატეგორიული უარი მიიღეს.
ეს ადამიანები კი არ იმალებიან, უბრალოდ, მათი კომპანიები გაკოტრებულად ცხადდება, ერთჯერადი კომპანიებით მუშაობენ
- ბოლო დროს არა მხოლოდ საქართველოში, არამედ დსთ-ს მთელ რიგ ქვეყნებში დაგეგმილი კონცერტები ჩაიშალა. ყველა ამ კონცერტს აერთიანებს მაყურებლისთვის აბსოლუტურად უცნობი საკონცერტო ორგანიზაციები. ეს დაახლოებით ათკაციანი თაღლითური ჯგუფი რამდენიმე წელია მუშაობს სქემით, რომელზეც ქვემოთ მოგახსენებთ. ქმნიან ახალ კომპანიას, რომელიც ვარსკვლავს კონკრეტულ ქალაქში კონცერტზე უთანხმდება. შეთანხმებული ჰონორარიდან მინიმალურ თანხას ავანსად იხდიან, ვთქვათ 30 000 დოლარიდან ხუთი ათასს. ამასობაში ეძლევათ რეკლამის გაკეთების, ბილეთების გაყიდვის უფლება. შემდეგ კი, თუკი რამდენიმე დღით ადრე კონცერტს გააუქმებს, ზემფირას რჩება ავანსი, მაგრამ დანარჩენ ფულს ვერ იღებს, ვერც კონცერტს ატარებს, ორგანიზატორს კი ბილეთების ფული მთლიანად რჩება. შესაძლოა, რეკლამაში ჰქონდეს ხარჯი და ის ავანსი, რომელიც უკვე გადახდილი აქვს. ვერც ერთი სასამართლო ვერ მოუგებს პროცესს და ვერ დააბრუნებინებს თანხას მაყურებლებისთვის, ისეთი ტიპის ხელშეკრულებებს უფორმებენ სხვადასხვა ქვეყანაში დარბაზებს. გაუქმებული კონცერტების სია საკმაოდ ვრცელია, მაყურებელს კი ფულს არ უბრუნებენ. მთელი უბედურება ისაა, რომ თაღლითები ცვლიან კომპანიების დასახელებებს. ეს ადამიანები კი არ იმალებიან, უბრალოდ, მათი კომპანიები გაკოტრებულად ცხადდება, ერთჯერადი კომპანიებით მუშაობენ, რომელთაც არ გააჩნიათ დივიდენდები, მომჩივანმა მხარემ რომც მოიგოს, თანხას მაინც ვერ ამოიღებს.
- პირველი შემთხვევა რომელ ვარსკვლავთან დაკავშირებით მოხდა?
- 2010 წელს კიევში ტატიანა ბულანოვას კონცერტი ჩაიშალა. შუფუტინსკიმაც განაცხადა უკვე ამის შესახებ. ეს ყველაფერი არტისტების სახელსა და რეპუტაციაზე მოქმედებს. მაყურებელს ჰგონია, რომ ღონისძიება არტისტის მიზეზით არ შედგა. ამიტომაც ვარსკვლავები უკვე ფრთხილობენ და ერთჯერად კომპანიებთან ხელშეკრულების გაფორმებას ერიდებიან.
- ვინ შედის ამ დაჯგუფებაში?
- სომხეთიდან მოსკოვში ჩასული დაჯგუფებაა. მათ მეც შემომთავაზეს თანამშრომლობა, მაგრამ კატეგორიული უარი მიიღეს. ისინი ჩადიან სხვადასხვა ქალაქში, ერიდებიან ცენტრალურ ქალაქებს და ძალიან გამიკვირდა, როგორ გარისკეს თბილისში კონცერტის დანიშვნა.
- ბოლოს ბათუმსა და თბილისში ირინა ალეგროვას კონცერტები გადაიდო. ამ კომპანიის საქმიანობაში ქართველი ხომ არ იყო ვინმე ჩართული?
- არა, რადგან ასეთ რამეს თავად ისინი ვერ გარისკავენ.
- რამდენადაც ვიცი, ბილეთები საკმაოდ ძვირი ღირდა.
- დიახ, 100-150 ლარი. როდესაც ყიდულობ პროდუქტს, მწარმოებელს ხომ ნახულობ. კონცერტების შემთხვევაშიც იგივეა. კარგად უნდა შეამოწმო, რომელი ორგანიზაციისგან ყიდულობ ბილეთს. მაყურებელმა წინასწარ უნდა შეისწავლოს, ვინ არის ორგანიზატორი ან დაელოდოს ვარსკვლავის თბილისში ჩამოსვლას და როდესაც ტელევიზიით დაინახავს, რომ პრესკონფერენცია გაიმართა და კონცერტისთვის მზადება მიდის, მაშინ შეიძინოს ბილეთი, კონცერტამდე ერთი-ორი საათით ადრე.
- შესაძლებელია, რუსმა ვარსკვლავებმა უარი თქვან საქართველოში ჩამოსვლაზე?
- არა, ვარსკვლავი უარს არასდროს იტყვის, თუკი ავანსი მიღებული აქვს.
- დაახლოებით რა სარგებელი ნახეს, ვთქვათ, ალეგროვას კონცერტებიდან?
- მხოლოდ ფილარმონიის კონცერტიდან შეგიძლიათ გადათვალოთ, 2000 ბილეთს რომ 150 ლარად გაყიდდნენ, რა მოგება დარჩებოდათ. ამას მხოლოდ ავანსის ფულს გამოაკლებდნენ და დანარჩენი მათი მოგება იქნებოდა.
- ამის საწინააღმდეგოდ რა შეიძლება გაკეთდეს?
- პროდიუსერებს გვაქვს ერთმანეთთან ურთიერთობა და თუკი ასეთ რამეს ვიგებთ, აუცილებლად ვცვლით ერთმანეთთან ინფორმაციას, თუმცა მათთვის თვალყურის მიდევნება ძნელია, რადგან დღეს ერთ კომპანიას ხსნიან, ხვალ მეორეს, ზეგ მესამეს და ერთიმეორის მიყოლებით აუქმებენ. საქართველოში ბევრი ადგილობრივი პრომოუტერი და კონცერტების ორგანიზატორია და ჯობია, მაყურებელმა მათ მიერ გამართულ კონცერტებზე იაროს, ვიდრე ამგვარი ორგანიზაციების მოწყობილ ღონისძიებებზე, რომელთაგან არც ერთი არ გაიმართა. საბოლოოდ კი მხოლოდ და მხოლოდ ქართველი მაყურებელი დაზარალდა...
ნინო მურღულია
ჟურნალი ''რეიტინგი''
