ერთად თავს კარგად ვგრძნობდით და ''სხვა'' ეტაპი დაიწყო მანანა ბერიკაშვილის ქალიშვილმა ანო მაისურაძემ და მსახიობმა ნიკა ნანიტაშვილმა ხელი იმ სცენაზე მოაწერეს, სადაც ერთმანეთი გაიცნეს.

- მე და ნიკამ ერთმანეთი ერთი წლის წინ გავიცანით, როცა დედაჩემმა მოზარდ მაყურებელთა თეატრში დაიწყო სპექტაკლის''ჩვენ გველის დიდება'' დადგმა. თავიდან ყველა მსახიობი ერთად გავიცანი და ნიკას მიმართ რაიმე განსაკუთრებული დამოკიდებულება არ მქონია, რეპეტიციების დროს დავმეგობრდით. როცა მეკითხებიან, როდის გადაიზარდა თქვენი მეგობრობა სიყვარულშიო, პასუხს ვერ ვცემ, იმიტომ, რომ ნამდვილად არ მახსოვს. სპექტაკლის მზადების პერიოდში თითქმის 24 საათი ერთად გვიწევდა ყოფნა, მივეჩვიეთ ერთმანეთს, მერე კი მივხვდით, რომ ერთად თავს კარგად ვგრძნობდით და''სხვა'' ეტაპი დაიწყო.

- დედა იცნობდა ნიკას, მაგრამ ოჯახის დანარჩენი წევრები როგორ შეხვდნენ თქვენს გადაწყვეტილებას?
- სანამ ჩვენი ურთიერთობა ოფიციალურ სახეს მიიღებდა და მანანა ჩვენი გრძნობების შესახებ გაიგებდა, ნიკას მიმართ ისედაც დიდი სიმპათია ჰქონდა. როცა ჩვენი სიყვარულის შესახებ შეიტყო, ძალიან ბუნებრივად მიიღო, ერთად დიდი დროის გატარება გვიწევდა, რამაც დედას მისცა საშუალება, ნიკა კარგად გაეცნო. რაც შეეხება ოჯახის სხვა წევრებს, ნიშნობამდე ცოტა ადრე გივიმ იკითხა, ეს ბიჭი ასე ხშირად რატომ დადის ჩვენს სახლშიო?! ყველა კი ხვდებოდა, რაშიც იყო საქმე, მაგრამ ეს ხუმრობით თქვა. როცა გამოვაცხადეთ, რომ დაქორწინება გვინდოდა, ოჯახის წევრებისთვის ეს ალბათ პატარა შოკი იყო, ჩვენთვის კი ვმსჯელობდით უკვე ოჯახის შექმნაზე, მაგრამ დანარჩენებისთვის ეს მოულოდნელი აღმოჩნდა. ყველას გაუხარდა, მაგრამ მოვლენები სწრაფად განვითარდა და გააზრება, გათავისება ცოტა გაუჭირდათ.

- ყველაფერი რომ ტრადიციების დაცვით მომხდარიყო, ეს თქვენი გადაწყვეტილება იყო?
- პომპეზური და დიდი ქორწილი ჩემი ოცნება არასდროს ყოფილა, ზოგადად, ქორწილი რომც არ მქონოდა, გულიც კი არ დამწყდებოდა, მაგრამ საბოლოო ჯამში ჩვენი ქორწილი ისეთი გამოვიდა, ნამდვილად ვინანებდი, რომ არ გვქონოდა.

- თეატრში ხელისმოწერა ვისი იდეა იყო და ვინ გაუკეთა ორგანიზება?
- ყველამ ერთად მოვიფიქრეთ და გადავწყვიტეთ, რომ ხელი თეატრში მოგვეწერა, მაგრამ ორგანიზება საკუთარ თავზე მანანამ აიღო. მეგობრები ძალიან დამეხმარნენ, სცენა ჩემმა მეგობარმა, ნიჭიერმა მხატვარმა ნიკა სახამბერიძემ გააფორმა. ჯვრისწერის შემდეგ მივედით მოზარდ მაყურებელთა თეატრში და სიმბოლურად იმ სცენაზე მოვაწერეთ ხელი, სადაც ერთმანეთი გავიცანით.

- ოჯახის რომელ წევრს გაუჭირდა ყველაზე მეტად სახლიდან შენი წასვლა?
- საქმე ისაა, რომ არსად წავსულვარ (იღიმის). გათხოვებამდე ოჯახში მე, გივი, ლეილა, მანანა და ჩვენი ძაღლი ვცხოვრობდით, ქორწილის შემდეგ კი ბებია-ბაბუა ჩვენს ძველ სახლში გადავიდნენ, ძაღლიც თან წაიყვანეს, მე, მანანა და ნიკა კი ერთად ვცხოვრობთ. გივისა და ლეილასთან ცხოვრებას ძალიან ვიყავი შეჩვეული, დიდ კომფორტს მიქმნიდნენ, ალბათ, ცოტა ხანს მეც და მათაც გაგვიჭირდება, მაგრამ ერთმანეთთან ახლოს ვცხოვრობთ და ჩვენ შორის დისტანცია არ გაჩენილა.

ციცი ომანიძე
ჟურნალი ''რეიტინგი''