წელს აქსესუარები, როგორიც არის საყურე, ყელსაბამი, ბეჭდები, ნაკლებად უნდა გამოვიყენოთ დიზაინერმა ანა ბოტკოველმა სამხატვრო აკადემიის სახვითი ხელოვნების ფაკულტეტი ფერწერის მიმართულებით დაამთავრა. მოდა ბავშობიდან აინტერესებდა, გადაწყვიტა, ამ სფეროში ძალები მოესინჯა და მეგობარ ანი გეგელიძესთან ერთად სამხატვრო სტუდია ლოწ სტუდიო ჩამოაყალიბა. გოგონებმა რამდენიმე ნამუშევარი შექმნეს, რომლებმაც დიდი მოწონება დაიმსახურა.
ჩვენს რესპონდენტს საკუთარი ხაზიც აქვს და ექსკლუზიურ მოდელებს ქმნის, უყვარს მრავალფეროვნება, ამიტომ ყველანაირ ფაქტურასა და ფერს იყენებს.

- მოდის სამყაროში თითქოს ყველაფერი ამოწურულია, ამიტომ ვცდილობ, არ გავიხედო წარსულში და ინსპირაცია აწმყოში ვეძებო.
- როგორი სილუეტის სამოსის ტარებას გვირჩევთ?
- მე ყოველ მოდელს ინდივიდუალურად ვუდგები და შესაბამისად, განსხვავებულ სილუეტებს ვქმნი, თუმცა ამჟამად ვუერთდები მოდის ტენდენციას და ვცდილობ, თავისუფალი სილუეტის სამოსი შევქმნა.
- რომელი ფერები და რომელი ფაქტურაა აქტუალური ამ სეზონზე?
- ბორდოსფრისა და ლურჯის სხვადასხვა ტონალობა. რაც შეეხება ფაქტურას, ძალიან აქტუალურია ბაილონის ქსოვილისგან შეკერილი ტანსაცმელი, კაბები და ლაბადები.
- რაც შეეხება კაბის ფორმას, სიგრძეს... როგორი კაბები შევარჩიოთ?
- სასურველია ნატურალური ქსოვილის, ერთ ტონალობაში გადაწყვეტილი სწორი, უსახელო, მუხლამდე კაბა.
- გვითხარით, რა დეტალები უნდა გავითვალისწინოთ ზედატანის შერჩევისას?
- ამ სეზონის ზედატანი შეიძლება იყოს თავისუფალი ფორმის, შიფონის ან რომელიმე თხელი, გამჭვირვალე ქსოვილისგან შეკერილი. ასეთი სტილის ზედატანს არ სჭირდება გადატვირთვა ზედმეტი აქსესუარებით, გარდა სადღესასწაულო დღეებისა.
- საინტერესოა პიჯაკისა და ჟილეტის საკითხი, როგორი შევარჩიოთ მომავალი სეზონისთვის?
- პიჯაკის შემთხვევაში სასურველია, ერთი ზომით პატარა მოირგოთ. რაც შეეხება ჟილეტს, უნდა იყოს მუქი ფერის, უხეში ქსოვილის და უნდა ვატაროთ თეთრ პერანგზე.
- ფეხსაცმლის შერჩევისას რა დეტალებს მივაქციოთ ყურადღება?
- ყოველდღიური მოხმარებისთვის ძალიან მოსახერხებელია დაბალლანჩიანი ფეხსაცმელი ყოველგვარი აქსესუარებისა და მეტალების გარეშე. რაც შეეხება მაღალქუსლიან ფეხსაცმელს, აქცენტი უნდა კეთდებოდეს ქუსლზე და ის უნდა იყოს მსხვილი ფორმის.
- ჩანთებზე როგორი ტენდენციაა? წელს ისევ მოდურია ქლაჩები, თუ დიდი ზომის ჩანთებზე უნდა გადავინაცვლოთ?
- მიმაჩნია, რომ ჩანთა ერთ-ერთი სერიოზული აქსესუარია და ჩვენი ჩაცმულობის შესაბამისად უნდა განვსაზღვროთ, როგორს მივანიჭოთ უპირატესობა. ქლაჩები ისევ აქტუალურია, ყოველდღიურობაში კი უნდა გამოვიყენოთ საშუალო ზომის ჩანთები.
- რა შეიძლება ითქვას აქსესუარებზე, რა მასალისგან შექმნილი, როგორი ფორმის, ზომის სამკაულებით შეიძლება სამოსის გამრავალფეროვნება?
- წელს აქსესუარები, როგორიც არის საყურე, ყელსაბამი, ბეჭდები, ნაკლებად უნდა გამოვიყენოთ.
- გარდა შანელისეული პატარა შავი კაბისა, კიდევ რა უნდა იქონიოს ქალმა გარდერობში, რომ ის მეტ-ნაკლებად მოდურად ჩაითვალოს?
- განსაკუთრებულ მნიშვნელობას ვანიჭებ ფეხსაცმელს. თუ გაქვს გარდერობში კრისტიან ლაბუტენის ფეხსაცმელი, რომელსაც შეიძლება შეუხამო რომელიმე ახალგაზრდა დიზაინერის სამოსი, მაშინ ნამდვილად მოდურად ჩაცმული იქნები.

ციცი ომანიძე
ჟურნალი ''რეიტინგი''