ყოველთვის ვჩხუბობთ, მაგრამ ვგიჟდებით ერთმანეთზე Toresa მეტსახელია, რომელიც მამიდან შვილზე გადავიდა, Mossy კი - გვარის შემოკლებული ფორმა. 2014 წლის ლიტერატურული პრემია ''საბას'' შორტლისტში, საუკეთესო ლიტერატურულ დებიუტანტთა შორის, მისი რომანი ''სიბრძნე სიცრუისა'' მოხვდა. გამარჯვებულები შემოდგომაზე გამოვლინდებიან, მანამდე კი ვახო მოსიაშვილს ''მწერლის ანკეტის'' შევსება ვთხოვეთ...

სახელი, გვარი, დაბადების თარიღი და პროფესია

Toresa Mossy 02.08.1984. სახელმწიფო დოკუმენტებს თუ დავუჯერებთ, იურისტი (იღიმის).

მე და თელავი...

ყოველთვის ვჩხუბობთ, მაგრამ ვგიჟდებით ერთმანეთზე (იღიმის).

წერა დავიწყე, როცა...

წასაკითხი ახალი წიგნი ვერ ვიპოვე.

ჩემი ბლოგები...

საინტერესოა, თუ წაკითხვების რაოდენობით ვიმსჯელებთ, მაგრამ აღარ ვწერ. დღემდე ვერ მივხვდი, ეს რა ჟანრია, თუ საერთოდ შეიძლება ვთქვათ, რომ ჟანრია. რაღაც პირად სენტიმენტალურ გრძნობებსა და ჟურნალისტურ სტატიებს შორის გაჩხერილი მოვლენაა, ამიტომ იშვიათად ვკითხულობ და კიდევ უფრო იშვიათად ვწერ.

ჩემი ინტერესები...

მთელი სამყარო და ადამიანები ამ სამყაროში.

მე და მუსიკა...

ერთად დავიბადეთ. მე მუსიკაში და მუსიკა ჩემში. საზღვარი, პრინციპში, არ გვაქვს.

მე – მკითხველი...

ვკითხულობ ყოველთვის, ყველგან, ყველა სიტუაციაში, მაგალითად, სტომატოლოგის სავარძელში პირდაფჩენილიც. მქონია ასეთი შემთხვევაც (იცინის).

როცა არ ვწერ, მაშინ...

ვცდილობ, ვიცხოვრო.

ადგილი, სადაც ყველაზე უკეთ ვგრძნობ თავს...

დედამიწა.

ვმეგობრობ...

ადამიანებთან, ძაღლებსა და წიგნებთან. კიდევ - საყვარელ მუსიკოსებსა და მწერლებთან მიუხედავად იმისა, რომ მათი უმრავლესობა ცოცხალი აღარ არის.

მაღიზიანებს...

ყველა და ყველაფერი, როცა ვწერ, და არავინ და არაფერი, როცა არ ვწერ.

მამშვიდებს...

ჩახუტება.

აქტიურობა მარიხუანის დეკრიმინალიზაციის მოთხოვნით...

არავის და არაფერს არ შეუძლია ჩემი შეჩერება, სანამ მიზანს არ მივაღწევ.

ანა კალანდაძე
ჟურნალი ''რეიტინგი''