ადრე მოდა რომ იცვლებოდა, ახალი სამოსი ცვლიდა ძველს მარიამ გოგიაშვილი სკოლას ახლა ამთავრებს, თუმცა უკვე შექმნილი აქვს საკუთარი ბრენდი. რამდენიმე წლის წინ მაისურებზე ხატვა დაიწყო, მანამდე კი პარკებისგან შექმნილი კაბების პატარა კოლექცია გააკეთა, თუმცა მისმა მაისურებმა იმდენად დიდი მოწონება დაიმსახურა, რომ მიხვდა, გაგრძელება ღირდა. დღეს კი მისი ნაწარმი თბილისში, ერთ-ერთ ქუჩაზე მდებარე მაღაზიაში, ქართველი დიზაინერების მიერ შეკრილი სამოსის გვერდით იყიდება.

- მაისურებზე პრინტს აკეთებ, თუ სხვა ხერხით ხატავ?
- მაისურებზე ხელით ვხატავ, ეს ზუსტად ისეთი შემოქმედებითი პროცესია, როგორიც ჩვეულებრივი ხატვა, რომელსაც ჩემთვის გართობის სახე აქვს. პირველი ნამუშევარი ''შანელის'' პოპარტით საკმაოდ დიდი რაოდენობით გაიყიდა, მართალია, ნახატი ჩემი ფანტაზიით არ იყო შექმნილი, მაგრამ ყველა მაისური ჩემი ხელით იყო მოხატული. 40 ცალი რომ გაიყიდა, დავფიქრდი და მივხვდი, რომ ღირდა გაგრძელება და დღემდე ამ საქმით ვარ დაკავებული. საერთოდ, არ მიყვარს ნახატის გამეორება, განსაკუთრებით მაშინ, როცა იდეა ჩემია, მაგრამ როცა მოთხოვნა დიდია, ამასაც ვაკეთებ. შედარებით ნაკლებად მიზიდავს შეკვეთა, რომელიც თავიდან ბოლომდე მომხმარებლის ინიციატივით უნდა შევასრულო, ამ შემთხვევაშიც კი ვეუბნები ადამიანს, რომ ჩემეულ დეტალებს შევიტან, ასე რომ, გადმოხატული მაისურები არ მაქვს.
- გარდა მოხატული და პრინტიანი მაისურებისა, როგორი ზედატანებია მოდაში?
- მე რა მომწონს და რა არა, ამაზე არ ვილაპარაკებ, მაგრამ ახლა მოდაშია თეთრი, შავი და ასევე მკვეთრი ფერის მაისურები დიდი მძივებითა და აქსესუარებით. შეიძლება, სამკაული კაბას ან ზედას მიმაგრებული ჰქონდეს, მაგრამ ასევე შესაძლებელია, დამოუკიდებლად ეკეთოს. რაც შეეხება ფეხსაცმელს, ესპადრელები ძალიან აქტუალურია. ადრე ამ მხრივ უფრო მუქი ფერები ჭარბობდა, ახლა კი გაფერადდა, რაც კარგია.
- შარვლების, კაბებისა და ქვედაბოლოების თვალსაზრისით რა ტენდენციები იკვეთება?
- ყველანაირი შარვალია მოდაში, მაგრამ, ჩემი აზრით, ახლა ზოგადად შარვალი ნაკლებად აქტუალურია. პატარა გოგონები უფრო მოტკეცილ კაბებსა და ქვედაბოლოებს იცვამენ, თუმცა ასევე მოდაშია ელი სააბის სტილის გაშვებული კაბები, ბრჭყვიალებით გაფორმებული.
- ჟილეტებზე რას გვეტყვი, რომელიც ამ სეზონზე ძალიან აქტუალური გახდა?
- ჟილეტები მართლაც ძალიან აქტუალურია, თან ვხვდებით სხვადასხვანაირს, ამოჭრილი, ან გამჭვირვალე ზურგით, ჯინსის და ა.შ. სხვათა შორის, ჯინსის ჟილეტი შეიძლება მოიცვათ სადა ფერად კაბაზე და გამორჩეული იქნებით.
- ფაქტურის კუთხით რა უნდა გავითვალისწინოთ?
- ტყავი ინარჩუნებს წამყვან პოზიციას, მაგრამ ამ სეზონზე უპირატესობა უფრო მყარ და მაგარ ნაჭრებს ენიჭება. ცცც, უბრალოდ, ახალი ემატება. შესაბამისად, არჩევანი დიდია და ადამიანს შეუძლია, თავისი ინდივიდუალური სტილი შექმნას.

ციცი ომანიძე
ჟურნალი ''რეიტინგი''