ამ პერიოდის ტენდენციებში ძალიან დიდ როლს თამაშობს აქსესუარები დიზაინერმა ტატა მჭედლიშვილმა სამხატვრო აკადემია მოდის დიზაინის განხრით დაამთავრა, სადიპლომოდ შექმნა კოლექცია სახელწოდებით ''ისევ ბავშვობაში'', რომელიც ახლა ერთ-ერთ მაღაზიაში იყიდება. ჩვენი რესპონდენტი ამჟამად ფეშენმარკეტინგს სწავლობს, სურს, ამ სფეროში ცოდნა კიდევ უფრო გაიღრმავოს და შემდეგ უკვე მთელი მონდომებით შეუდგეს საქმეს.

- ახლა ისეთი პერიოდია, ყველაფერია მოდაში, თუმცა გვაქვს გამოკვეთილი ტენდენციები. მაგალითად, კლასიკური და სპორტული სტილის ნაზავი, მრავალფეროვანი ნაჭრების გამოყენება, ასევე შეიძლება საზაფხულო სამოსის დეტალურად გაფორმება ტყავით.
მოდურია ვიწრო, ქალური სილუეტი სპორტული ელემენტებით. ამ პერიოდის ტენდენციებში ძალიან დიდ როლს თამაშობს აქსესუარები, განსაკუთრებით ხის მასიური სამკაულები. თავიდან მოთხოვნა იყო ყელსაბამებზე, მაგრამ ახლა უკვე დიდი და ორიგინალური სამაჯურები და საყურეებიც ძალიან აქტუალური გახდა. ჩანთებიდან მოდურია საკვოიაჟები და ზურგჩანთები.
- კლასიკურ სამოსში სპორტული ელემენტები როგორ შევიტანოთ?
- კლასიკური სილუეტის კაბა შეგიძლიათ ჩაიცვათ კედსა და ბოტასთან, ოღონდ ეს არ უნდა იყოს ძალიან კლასიკური, მაგალითად ატლასის ნაჭრისგან შეკერილი კაბა. ბოტასმა კი უფრო კლასიკური იერი მიიღო.
- შარვლების მოყვარულებმა რა უნდა გაითვალისწინონ?
- მოდაშია კოჭამდე სიგრძის, ფართხუნა ან შლაქსის ტიპის, მუხლიდან გაშვებული შარვლები. თუმცა თეძოდან გაფართოებული შარვლებიც არაა ტენდენციებიდან ამოვარდნილი.
- ზედატანების მხრივ რა დეტალებია საყურადღებო?
- აქტუალურია ყოველდღიური სტილი, ანუ ჩვეულებრივი მაისურები, თუნდაც დაფხრეწილი დეტალებით, ასევე პრინტიანი ზედები. გამორჩეული ტენდენცია გახლავთ დიდი აქსესუარები ამ ყოველდღიურ, ჩვეულებრივ მაისურებზე. ბოლო ორი წელია, აქსესუარებზე დიდი აქცენტი კეთდება.
- ბოტასი რომ მოდურია, ეს ვთქვით, მაგრამ რა უნდა გავითვალისწინოთ ქუსლიანი ფეხსაცმლის შერჩევისას?
- უფრო ჰაეროვანი გახდა, მსხვილი ქუსლი და თხელი ცხვირი ის დეტალებია, რომლებიც უნდა გაითვალისწინოთ. ასევე მოდურია ესპადრელები და დაწნულძირიანი ღია ფეხსაცმელი.
- ქუჩაში, ყოველდღიურად, ხშირად ვხვდებით გოგონებს ქუსლიანი ფეხსაცმლით, შეიძლება, ეს მოდურად ჩაითვალოს?
- კი, მოდურია, მაგრამ პირადად მე ვერ ვიყენებ მაღალქუსლიან ფეხსაცმელს, ამას სპორტული სტილი და დაბლები მირჩევნია, მაგრამ ქალი ქუსლებზე ლამაზი და მიმზიდველია.
- კაბებისა და ქვედაბოლოების თვალსაზრისით მოდა რა სიახლეებს გვთავაზობს?
- გასული სეზონისგან განსხვავებით, ქვედაბოლოს წელის ხაზმა თეძოს ქვემოთ ჩამოიწია, ფორმები კი ცოტათი ასიმეტრიული გახდა.
- გაზაფხული პიჯაკების სეზონია, როგორი ფორმისა და სილუეტის პიჯაკებია მოდური?
- უფრო მუხლამდე სიგრძის უსახელო პიჯაკები, ანუ ჟილეტებია მოდური. სწორხაზოვანი და მინიმალისტური სილუეტის.
- დასასრულ, რჩევა მივცეთ სკოლადამთავრებულ ახალგაზრდებს, როგორი კაბები მოირგონ ბანკეტებისა თუ სხვა საღამოებისთვის?
- უმჯობესია, კაბა იყოსა სადა, არააქცენტირებული ფორმებზე, გამოკვეთილი კი იყოს მაკიაჟი და აქსესუარები.

ციცი ომანიძე
ჟურნალი ''რეიტინგი''