ეკა მამალაძე მალე 60 წლის გახდება და ამ თარიღს შეხვდება ახალი გეგმებით, რომელთა შესახებაც ჟურნალ „სარკეს“ ესაუბრა, განვლილი ცხოვრების მნიშვნელოვანი ეპიზოდების გახსენებასთან ერთად.

ეკა მამალაძე:

„არაფერი გვიანი არ არის. ჩვენ, ქართველებს, გვაქვს ცუდად აღქმული, რომ თითქოს 60 წლის ასაკში როგორ შეიძლება სიყვარულსა და გათხოვეაზე ფიქრი. ამ ეტაპზე თავს კარგად ვგრძნობ, მაგრამ თუ გამოჩნდა სიყვარული, ეს ჩემთვის მიუღებელი არ იქნება.

28 წლის ვიყავი, როცა დავქვრივდი და ორი შვილით დავრჩი მარტო. როცა მივხვდი, რომ ცხოვრება უნდა გამეგრძელებინა, გავაგრძელე კიდეც. ეს არ ნიშნავს, რომ ჩემს მეუღლეს და მის ოჯახს პატივს არ ვცემდი. შეიძლება, არ დაიჯეროთ, მაგრამ ჩემი პირველი ქმრის, გოგის დაბადების დღეს, 3 მაისს, ოჯახში ყოველთვის აღვნიშნავთ. ეს ტრადიცია არც მაშინ დარღვეულა, როდესაც მეორე ქმარი მყავდა“.

მომღერლი ინტერვიუში დედის, ნანი ბრეგვაძის შესახებაც საუბრობს:

„მე თვითონ მიკვირს ხოლმე ნანის გამოსვლების საზოგადოებაში. სახლში ხანდახან შეიძლება მოიწყინოს, თავს უფლება მისცეს, მოდუნდეს, მაგრამ თქვენც ნახეთ ალბათ, როგორ გამოიყურებოდა „მხოლოდ ქართულის“ კონცერტზე თეთრ კაბაში. ისე იმღერა პირდაპირ ეთერში, რომ რამდენიმე მომღერალმა არ დაიჯერა და თქვა, ალბათ, ჩანაწერი იყოო. ნანი ჩემი სტიმულია და ალბათ, ამიტომ არ მეშინია არანაირი ასაკის…“