იუმორისტ ვანო ჯავახიშვილის გამოკითხვა ქალაქის მთავარ სამმართველოში დასრულდა. იუმორისტი სამმართველოში ემზარ კვიციანის განცხადების შემდეგ დაიბარეს, კვიციანმა გუშინ სოციალურ ქსელში ვანო ჯავახიშვილის მკვლელობა დაანონსა. ფაქტს დღეს ქვეყნის მთავარი პროკურორი ირაკლი შოთაძეც გამოეხმაურა.

„რეიტინგი“ ვანო ჯავახიშვილს გამოკითხვის დეტალებზე ესაუბრა:

- ეს იყო ზედაპირული გამოკითხვა. სამართალდამცავები დაინტერესდნენ წარსულში იყო თუ არა ჩემი მისამართით მუქარის ან ზეწოლის მცდელობა. რაც არასდროს არ ყოფილა. ემზარ კვიციანის განცხადებაში კომიკური ის იყო, სოროსი რომ ახსენა. მითები სოროსის შესახებ ჩემი ბავშვობიდან მახსოვს. მე ვფიქრობ, ემზარ კვიციანის მხრიდან ეს იყო მუქარა გაფრთხილებასავით. მას გუშინ საკუთარმა თანაპარტიელებმაც დაუჭირეს მხარი, ირმა ინაშვილმა და ადა მარშანიამ უკან ვეღარ წაიღეს ემზარ კვიციანის სიტყვები და ამას ემსახურებოა მათი გამოხმაურებაც. თითქოს ისინი მიცავენ უხილავი სოროსისგან. ვფიქრობ ეს იყო მესიჯი ჩემი ოჯახის მისამართით, რადგან დაიზაფროს და ფსიქოლოგიური ზეწოლა მოხდეს მათზე.

- სააკაშვილის მასხარაც გიწოდეს ემზარ კვიციანის მხარდამჭერებმა...
- ეს უკვე მოძველებული ამბავია. თუ ასეთი მაგრები არიან, მაჩვენონ ერთი ფაქტი ან თუნდაც სატელეფონო ჩანაწერი, საიდანაც ჩანს რომ მიხეილ სააკაშვილი ერევა ჩემს გადაცემაში. სააკაშვილთან და მსგავსი დონის ადამიანებთან არასდროს მისაუბრია. როცა ფაქტი არ გაქვს, უნდა გაჩუმდე ადამიანი. მითუმეტეს პარლამენტარს არ შეფერის დაუსაბუთებელი საუბარი. თუ ასე უნდა ვაბრალოთ ერთმანეთს რაღაცეები, მეც უამრავი რაღაცეების დაბრალება შემიძლია ჩემი გადაცემის მეშვეობით და მათ პუტინის მეგობრები უნდა ვუწოდო?