სასექსის ჰერცოგმა და ჰერცოგინიამ ბავშვის დაბადებიდან ორ დღეში საზოგადოებას მისი სახელიც გაანდეს. არჩი უინძორი, როგორც ჩანს, მოულოდნელი აღმოჩნდა ყველასთვის, რადგან ფსონებში, რომელთა დადებაც სამეფო ოჯახის გულშემატკივრებმა მის დაბადებამდე ჯერ კიდევ რამდენიმე თვით ადრე დაიწყეს, ის არ ფიგურირებდა.



შესაბამისად, ყველა გააოცა დეტალმა, რომლის შესახებაც ჯერ კიდევ იანვრის თვეში იწერებოდა. შეგახსენებთ, რომ წლის დასაწყისში 5 წლის პრინცი ჯორჯი დასთან - პრინცესა შარლოტასთან ერთად, რამდენიმე დღით, ქეით მიდლტონის მშობლების სახლში იმყოფებოდა და სწორედ ამ პერიოდში, ერთ-ერთმა გამვლელმა ქალბატონმა შეძლო ქუჩაში მასთან გამოლაპარაკება.



როგორც თვითმხილველი ჰყვება, პრინცი ჯორჯი თავად გაემართა ქალბატონისკენ, რომელიც ძაღლს ასეირნებდა და როდესაც უცნობმა მას სახელი ჰკითხა, ჯორჯმა საკუთარი თავი სულ სხვა სახელით მოიხსენია."არჩის მეძახიან", - ამგვარად უპასუხა ჯორჯმა ბრიტანელ ქალბატონს, რომელმაც, რა თქმა უნდა, იცნო ის.