ვფიქრობ, ჩემი, როგორც დედის ამოცანაა, შვილები კი არ განვსაჯო ან შევარცხვინო, არამედ სწორი მიმართულება მივცე. მაისის დასაწყისში გამოვიდა ეკრანებზე ბლოკბასტერი ''რკინის კაცი-3'', რომელშიც გვინეტ პელტროუმ ქალის მთავარი როლი შეასრულა. ჟურნალისტებთან შეხვედრისას გვინეტმა ფილმზეც ისაუბრა და თავის შვილებზეც.

- რა იყო ყველაზე მთავარი გადასაღებ მოედანზე?
- მინდოდა, რომ ფანტასტიკური კომიქსის გმირები რაც შეიძლება ადამიანურები ყოფილიყვნენ, მათი ურთიერთობები კი - რეალური. მგონი, მოვლენებით ასე გაჯერებულ ფილმში ეს მნიშვნელოვანია.
- შვილები თქვენთან იყვნენ?
- თავისთავად. ვაჟი ყველაზე მეტად განიცდიდა. დიდხანს ვერც იჯერებდა, რომ საკულტო ''რკინის კაცში'' მივიღებდი მონაწილეობას. ვაფასებ ჩემს საქმეს, მაგრამ ოჯახი ჩემთვის ცხოვრების მთავარი სიყვარულია. წელიწადში მაქსიმუმ სამ პროექტზე ვთანხმდები და ვცდილობ მეტი დრო გავატარო ბავშვებთან - ისინი ძალიან სწრაფად იზრდებიან. გარდა ამისა, ყოველთვის ვითხოვ, ისე დამიგეგმონ სამუშაო, რომ ჩემი ეპიზოდები ზედიზედ გადაიღონ - ამიტომაც სახლიდან დიდხანს არ მიწევს გასვლა. ეპლი და მოზესი გადაღებებზე უქმეების დროს მესტუმრნენ და ძალიან ბედნიერები იყვნენ.
- აღზრდის დროს რა მიგაჩნიათ უმთავრესად?
- პატივისცემა. ვფიქრობ, ჩემი, როგორც დედის ამოცანაა, შვილები კი არ განვსაჯო ან შევარცხვინო, არამედ სწორი მიმართულება მივცე. მე და ჩემი ქმარი (გვინეტის ქმარი ცნობილი მუსიკოსი კრის მარტინია - მთარგმ.) კარგ მანერებს ვაფასებთ და დარწმუნებული ვართ, ეს ბევრი ახალი შესაძლებლობისკენ მიმავალი სწორი გზაა. ვცდილობთ ავუხსნათ, რამდენად მნიშვნელოვანია არ იყვნენ კაპრიზულები და იყვნენ მადლიერნი, თუმცა იმავდროულად ვაგრძნობინებთ, რომ გვიყვარს ისეთები, როგორებიც არიან. არც კომპიუტერთან ვსვამ დიდხანს, ერთი საათი აქვთ ინტერნეტთან საურთიერთოდ.
- მშობლებს როგორი რეაქცია აქვთ, როცა სკოლაში მშობელთა კრებებზე დადიხართ?
- რა თქმა უნდა, როცა პირველად დამინახეს, გაოგნდნენ, მაგრამ მერე შეეჩვივნენ. ახლა სასკოლო საკითხების გარჩევისას მათ თანაბრად ვგრძნობ თავს და ისე მეკამათებიან, ხმის ჩახლეჩამდე, მათთვის სულ ერთია ჩემი ''ოსკარი''...
- რაიმე ნიჭი თუ გამოავლინეს შვილებმა?
- გოგონა მოდით არის შეპყრობილი! კაბებს კერავს თოჯინებისთვის და ეს დიდი გატაცება აქვს.
- წინ რა პროექტები გაქვთ?
- პიკასოს შესახებ ფილმის გადაღებებს ველოდები, ანტონიო ბანდერასთან ერთად უნდა ვითამაშო. თანაც, შესანიშნავი ესპანელი რეჟისორი კარლოს საურა გადაიღებს.

ჟურნალი ''რეიტინგი''