Vanity Fair-ის ყოველწლიურ ჰოლივუდის გამოცემის გარშემო ინტერნეტში მითქმა-მოთქმა არ წყდება. ამის მიზეზი ის გახდა, რომ რიზ უიზერსპუნსა და ოპრა უინფრის, ფოტოებზე სამი ხელი და სამი ფეხი აქვთ.
Vanity Fair-ი ტრადიციული ყოველწლიური გამოცემისთვის წლის ყველაზე კაშკაშა ვარსკვლავებს კრებს.

ჰოლივუდის წლევანდელი, 24-ე გამოცემის ფოტოები რამდენიმე დღის წინ გავრცელდა. ისინი ცნობილმა ფოტოგრაფმა ენი ლეიბოვიცმა გადაიღო.



ფოტოებზე რიზ უიზერსპუნი, ოპრა უინფრი, ნიკოლ კიდმანი, ტომ ჰენკსი, ჯესიკა ჩესტეინი და სხვა ვარსკვლავები არიან აღბეჭდილნი.
ფაქტს თავად ვარსკვლავებიც გამოეხმაურნენ.

“როგორც ვხვდები, ახლა ყველამ იცის... მე სამი ფეხი მაქვს. ვიმედოვნებ, მიმიღებთ ისეთს, როგორიც ვარ”,  - დაწერა უიზერსპუნმა Twitter-ზე.


მას მალევე უპასუხა ოპრამ: „მე ვიღებ შენს მესამე ფეხს. ვიცი, რომ შენც მიიღებ ჩემს მესამე ხელს“.
Vanity Fair-მა თქვა, რომ ოპრა უინფრის შემთხვევაში, მართლაც შეცდომა მოხდა და მას ონ-ლაინ ასწორებენ. რაც შეეხება რიზ უიზერსპუნის მესამე ფეხს, Vanity Fair-ის მტკიცებით, მისი არსებობის ილუზიას კაბის ნაკეცი ქმნის.