მიუხედავად იმისა, რომ ლედი დი პირველი ლამაზმანი არასდროს ყოფილა, უბრალო ხალხმა ის შეიყვარა და მისი ჩაცმის სტილს მილიონობით ქალი მისდევდა.

დიანა ყოველწუთს ფოტოკამერების ობიექტივში ხვდებოდა. პრესა მის ყოველ მოძრაობას აკვირდებოდა და გარდერობში უმნიშვნელო ცვლილებებსაც განიხილავდნენ.



მედიაში ერთი უცნაურობაც დაფიქსირდა: სადაც არ უნდა წასულიყო პრინცესა ყოველთვის თან ატარებდა ხელის „კლატჩს“, რომელსაც თითქმის ყველა სურათში მკერდზე იკრავს.

The Telegraph-თან ერთ-ერთ ექსკლუზიურ ინტერვიუში ჩანთების ბრიტანელმა დიზაინერმა, ანია ჰინდმარჩმა, რომლის მყიდველიც გახლდათ ლედი დი, „კლატჩის“ მკერდთან მიკვრის საიდუმლო გაამხილა.



დიზაინერის თქმით, პრინცესა დიანა ძალიან სასიამოვნო ადამიანი იყო: „ის ძალიან ლოიალური მყიდველი გახლდათ, რომლისგანაც ბევრ სიამოვნებას მიიღებდით.

ის ჩვენთან დაცვის გარეშე მოდიოდა და ზედმეტი შეზღუდვის გარეშე ყიდულობდა“.

მიზეზი, რატომაც ლედი დი „კლატჩს“ მკერდზე იჭერდა, საკმაოდ ბანალური აღმოჩნდა: უხერხულ სიტუაციაში რომ არ ჩავარდნილიყო, დიანა დეკოლტეს ამ პატარა ჩანთებით ფარავდა.

აღსანიშნავია, რომ ამ ხრიკმა პრინცესა ყვითელი პრესის ხმაურიან სათაურებს ბევრჯერ გადაარჩინა.

ანა გარელი