თუმცა ჩვენთან ინტერვიუში პროექტის დაწყებამდე ნოე სულაბერიძე, ანუ პროექტის გენერალური პროდიუსერი აცხადებდა, რომ წელს კრიტერიუმი ამა თუ იმ პროფესიაში ადამიანის წარმატება იყო და არა მთლად მისი ვარსკვლავობა.
ასე რომ, ამ კრიტერიუმებს მეტ-ნაკლებად ყველა
თქვენს ყურადღებას ჟიურის შემადგენლობაზე შევაჩერებთ, რომელიც, წინა სეზონთან შედარებით, უფრო მეტად საინტერესო და პროფესიულია. ამ შოუს ალბათ ვერც ერთი თქვენგანი ვერ უყურებს ისე გემრიელად, როგორც ეს გოჩა ჩერტკოევის ჟიურიში ყოფნისას ხდება.
ჩერტკოევის გარეშე ქართული ''ცეკვავენ ვარსკვლავები'' წარმოუდგენელია. მართალია, მას ქართული კიდევ უფრო დაჰვიწყებია და პირველი გადაცემის მსვლელობისას ინგლისურის უცოდინარი დუტა ეკირკიტებოდა, გვითხარი, რას ნიშნავს cute little couple-ო, ანუ საყვარელი პატარა წყვილი, მაგრამ გოჩას ინგლისურ-ქართული ლაპარაკით მაყურებელს უფრო
მეტი პროფესიული და სამართლიანი შენიშვნის მოსმენა შეუძლია ხოლმე, ვიდრე ჟიურის სხვა წევრების, ერთად აღებულის. წელს ეს გარემოება შეიცვალა, რადგან ცნობილი ბალერონი ნიკოლოზ ცისკარიძე გახდა ჟიურის წევრი, რომელიც, მართალია, სამეჯლისო ცეკვების შემსრულებელი არ გახლავთ, თუმცა ცეკვის შეფასება არ ესწავლება და სიმკაცრის კუთხით წლევანდელ ''ცეკვებზე'' გოჩა ჩერტკოევს უდავოდ გამოუჩნდა კონკურენტი.
მთელი საღამოს განმავლობაში გოჩა და ნიკოლოზი ერთმანეთს თითქოს იმაში ეპაექრებოდნენ, ვინ უფრო ნაკლებ ქულას დაწერდა და სამიანებსა და ოთხიანებს აფრიალებდნენ.
სოფო შევარდნაძე იმდენად დახვეწილი ქალბატონია და დიპლომატიც, რომ მის შენიშვნებს ძირითადად მხოლოდ საქებარ სიტყვებს შორის ამოიკითხავდით, ნინო სურგულაძე ჟიურიში მოკრძალებულად გამოიყურებოდა. ჟიურის ერთადერთი წევრი, რომლის იქ ყოფნას ვერაფრით გავამართლებთ, ოთარ ტატიშვილია.
დიდი იუმორით არ ბრწყინავს, რომ განსაკუთრებულად გაგვაღიმოს და ვერც ცეკვაში გამოირჩევა დიდი ტალანტით. ეტყობა, ეს გადაწყვეტილება იმით იყო განპირობებული, რომ ოთარი ''იმედის'' სახეა.
რაც შეეხება მონაწილეებს, ჟიურიმ შეფასებისას აშკარად გადააჭარბა, როდესაც სოფო ნიჟარაძეს უმაღლესი შეფასება დაუწერა, რადგან სოფოს ვალსი სულაც არ იყო განსაკუთრებულად შთამბეჭდავი, თუმცა ნიკოლოზ ცისკარიძემ თქვა, რომ ნაცნობობას პატივს სცემს და სოფო ძალიან უყვარს.
მისგან სიმკაცრის იმ ხაზის გაგრძელებას ველოდებით, როგორიც სხვა მონაწილეებისადმი გამოიჩინა. მაყურებლის თვალით დანახული ცეკვებიდან ალბათ დაგვეთანხმებით, რომ საუკეთესოდ პირველი ტურის კვალობაზე გამოიყურებოდნენ მომღერლები ნინი ცნობილაძე და იულია ქავთარაძე, მსახიობი გიორგი ყიფშიძე, ტელეწამყვანი თაკო ჩორგოლაშვილი და ტანმოვარჯიშე ქეთი ხატიაშვილი.
გადაცემის კურიოზად შეიძლება მივიჩნიოთ ნინა წკრიალაშვილის მკერდის შესაშური დემონსტრირება, რომლის დროსაც, როგორც ჩანს, მომღერალი მიხვდა, რომ ზედმეტი მოუვიდა და ცეკვის დასრულების შემდეგ მკერდი იმდენ ხანს და ისე ისწორა, რომ ყველას ყურადღება მიიქცია.
რაც შეეხება წამყვანებს, ლიკა ლაბაძე და კახა კინწურაშვილი საკმაოდ კარგ წყვილს ქმნიან და უფრო დინამიკურსაც, ვიდრე ნანკა კალატოზიშვილი და დუტა სხირტლაძე, მაგრამ ეს უფრო დუტას ბრალია - პირველ გადაცემაზე საკმაოდ ჩამქრალი გვეჩვენა. იმედია, შემდეგ გადაცემებზე უფრო აქტიური იქნება.
რაც შეეხება გამოხმაურებებს, ''ფეისბუქზე'' ძირითადად გადაცემის სამენოვნებას უსვამდნენ ხაზს. როგორც ''ფეისბუქის'' ერთ-ერთი მომხმარებელი წერდა, ''მინიმუმ სამი ენა უნდა იცოდე, რომ გაიგო, რა ხდება ''ცეკვავენ ვარსკვლავებში''.
ვისი ერთადერთი ფუნქციაც ლაპარაკია (ანუ ჟიური), იმან ქართული არ იცის, ვინც შეფასებაზე კომენტარი უნდა გააკეთოს, იმანაც არ იცის ქართული და ვინც მონაწილეს რაღაც უნდა ჰკითხოს, ის რუსულს ვერ სხლავს. მოკლედ, ვისი ენა ვის ქვიქსტეპშია, ვერ გაიგებ...'' ასეთ სახალისო ბევრ კომენტარს ნახავდით ინტერნეტსივრცეში, რაც ალბათ იმის ერთ-ერთი წინაპირობაა, რომ შოუ ძალიან რეიტინგული იქნება.
სალომე დადიანი
ჟურნალი ''რეიტინგი''
