საქართველოს ჟურნალისტური ეთიკის ქარტიის სამდივნომ დასაშვებად ცნო არასამთავრობო ორგანიზაცია "მომავლის სოფლის" განცხადება, ტელეკომპანია "რუსთავი 2-ის" გადაცემა "პროფილის" წამყვანის მაია ასათიანის წინააღმდეგ.

როგორც საქართველოს ჟურნალისტური ეთიკის ქარტიაში განმარტავენ, განმცხადებელი მიიჩნევს, რომ 2016 წლის 14 აპრილს გასულ გადაცემაში, რომელიც სტალინს ეძღვნებოდა, ჟურნალისტური ეთიკის ქარტიის რამდენიმე პრინციპი დაირღვა.

"1 პრინციპი, რომელიც ჟურნალისტს სიზუსტის დაცვას ავალდებულებს, ასევე მე-3 პრინციპის ის ნაწილი, სადაც ნათქვამია, რომ ჟურნალისტმა არ უნდა მიჩქმალოს მნიშვნელოვანი ფაქტები, არ უნდა გააყალბოს დოკუმენტები და ინფორმაცია. განმცხადებლის აზრით, დარღვეულია მე-7 პრინციპიც, რომელიც დისკრიმინაციას კრძალავს, აგრეთვე, არა არის დაცული მე-10 პრინციპი – ჟურნალისტმა პატივი უნდა სცეს ადამიანის პირად ცხოვრებას და არ შეიჭრას პირად ცხოვრებაში, თუ არ არსებობს განსაკუთრებული საზოგადოებრივი ინტერესი" - აცხადებენ ეთიკის ქარტიაში.

მათივე ცნობით, განმცხადებლის აზრით, "ჟურნალისტმა წინასწარგანზრახულობით გადაცემაში მიიყვანა, დასცინა და დისკრიმინაციულად მოექცა ფსიქიკური აშლილობის მქონე მოხუც ადამიანს (დადგენილება ყოფილი ეპისკოპოსის ილარიონ სამხარაძის სულიერი მდგომარეობის შესახებ არაერთხელ ყოფილა თავად რუსთავი 2-ის განხილვის თემა), არ გადაამოწმა საპატრიარქოსთან სტალინის საკითხის ოფიციალურობა და სულიერი აშლილობის მქონე ადამიანი გამოიყენა, როგორც მხარე და ეკლესიის ოფიციალური პოზიცია", – ნათქვამია განცხადებაში.

მიღებულ განცხადებას ქარტიის საბჭო ღია სხდომაზე განიხილავს.

ქარტიის განცხადებას ''პროფილი'' სოციალურ ქსელში პასუხობს. 

"1. გადაცემაში საპატრიარქოს პოზიცია იყო! ოფიციალური კომენტარიც! იმაზეც რომ მეუფე ილარიონი განკვეთილია და იმაზეც, რომ სტლინის წმინდანად შერაცხვას საპატრიარქო არ ითხოვს!

2. ადამიანის დისკრედიტაცია, თუ მას ფსიქიკური აშლილობა ჰქონდა ადამიანის უფლებათა მსოფლიო კონვენციას ეწინააღმდეგება - ანუ არ მოიწვიო, არ დაპატიჟო, არ ჰკითხო იმიტომ რომ 30 წლის წინ ეს დიაგნოზი ჰქონდა - საბჭოთა მიდგომა და დისკრედიტაციაა! ამ ლოგიკით რამდენიმე საკმაოდ ცნობილი ადამიანიც არასოდეს უნდა ჩნდებოდეს ეკრანზე.

3. გადაცემაში ნაჩვენები იყო კადრები "წმინდა იოსების"ე.წ "რელგიური რიტუალის", რომელშიც 100 მეტი ადამიანი, მათ შორის ახალგაზრდებიც მონაწილეობენ. გადაცემა სწორედ ამ პრობლემას ეძღვნებოდა!

4 . არანაირ დაცინვას ადგილი არ ჰქონია! რაშიც შეგიძლიათ თავად დარწმუნდეთ, თუ გადაცემის ამ მონაკვეთს ნახავთ! დამცინავი და შეურაცხმყოფელი კომენტრები ამ ადამიანის მისამართით იყო თქვენგან, სოც. ქსელში!

კიდევ ერთხელ ვრწმუნდები,რომ თემა დროულად და სწორად იყო შერჩეული, ერთი კვირაა სტალინზე მსჯელობთ! მეგობრებო, არ დაიღალეთ ლანდების დევნით?"