ცოტა ხნის წინ, მომღერალმა ეკა კვალიაშვილმა, რომელსაც ავტოიმუნური დაავადება გაფანტული სკლეროზი აწუხებს, საზოგადოებას დახმარების თხოვნით მიმართა. როგორც ამბობს, უფინანსობის გამო წამლის ყიდვა უჭირს. ვარსკვლავმა რუსთაველის თეატრში კონცერტი გამართა, იმედოვნებდა იმდენ ფულს მოაგროვებდა, სხვა დაავადებულებსაც უწილადებდა, მაგრამ სამწუხაროდ, მცირე თანხა მოგროვდა.

- ეკა, რა სახის მკურნალობა გჭირდებათ?
- გადასაღები მაქვს ხერხემალი, მარჯვენა ხელი და ფეხი. მარცხენა მხარეს თავის საშინელი ტკივილები მაქვს. მაქვს ასევე ალერგიული რეაქციები და 24 საათი წამლებს ვსვამ, რომლებიც იმ წუთას მიხსნის ტკივილს. ეს დაავადება თურმე დიდი ხანი მქონდა და ვერავინ იგებდა. მთელი ცხოვრება დავიტანჯე. ხან რის ექიმთან მივდიოდი და ხან რის.

ეს დაავადება არსად ჩანს, თუ კონტრაქტსტი არ შეიყვანეს ვენაში და ისე არ გადაღიღეს ტომოგრაფია. მეუბნებოდნენ, ყველაფერი წესრიგში გაქვსო. ერთი პერიოდი სახის მარჯვენა მხარე წამერთვა, ვეღარ ვაკონტროლებდი, პარალიზებული მქონდა. უცბად დამინიშნეს მკურნალობა და გამოვედი მდგომარეობიდან.

ხელი, ფეხი მიჩერდება. ლიფტი არ იყო, კიბეზე ფეხით ჩავედი და ვკიოდი, ისეთი ტკივილი დამეწყო. საშინელი დაავადებაა, ღმერთმა ყველას აშოროს.


ჟურნალი "სარკე"