„ამდენი გამწარებული ადამიანი მე მგონი, საქართველოს ისტორიას არ ახსოვს!!! კიდევ გიკვირთ!“
„აი, რა განსხვავებაა „ნაციონალ“ კურდღელ მამაკაცებსა და ძველი ბიჭი-2013-ს შორის. ხუმრობა იქით და ნამდვილად არასასიამოვნოა, როდესაც ზოგადად ადამიანები ჩხუბობენ, მაგრამ ამდენ ზიზღსა და უსამართლობას რომ დათესავ, შედეგს ასეთს და უარესს მიიღებ... საქართველოს მინისტრებიც ჰყოლია, მერიც, მაგრამ ხალხი ქუჩაში ფურთხებით და დედის გინებით არ დასდევდა. მარტო თქვენი ბრალია, რაც გჭირთ!!! და ისე კაფედან გაყვანა, რტყმევა, პატრულის უსამართლო მოქცევა, ეს ყველაფერი თქვენი დამკვიდრებულია. ამდენი გამწარებული ადამიანი მე მგონი, საქართველოს ისტორიას არ ახსოვს!!! კიდევ გიკვირთ!. კეთილი რჩევა, ბინაზე ჯობია ხოლმე აწი შეკრება. თუ დაგაინტერესებთ, კურიერის ნომერსაც მოგაწვდით სახლში მოტანის სერვისით. მეტი უსაფრთხოებისთვის. საჭმელსაც შეირგებთ და მოტეხილობებსაც ასცდებით!“ - ასეთი სტატუსი გამოაქვეყნა სოციალურ ქსელში ყოფილმა ტელეწამყვანმა სალომე გოგიაშვილმა მას შემდეგ, რაც რესტორან „ლა ტრუფეში“ მომხდარი ინციდენტის შესახებ საზოგადოებისთვის გახდა ცნობილი. 
შეგახსენებთ, რომ 11 მაისს, ღამით, ზემოხსენებულ რესტორანში „ნაციონალები“ საკმაოდ დიდი შემადგენლობით მივიდნენ. მათ შორის პრეზიდენტიც გახლდათ, რომელმაც ცოტა ადრე დატოვა კაფე, ვიდრე მისმა თანამეინახეებმა. იმავე რესტორანში ქვედა სართულზე იმყოფებოდნენ მამუკა ბაკურია, ცოტნე ბაკურიას ძმა, მეუღლესთან ერთად და ასევე კიდევ ერთი ადამიანი, გვარად მაზიაშვილი, რომლებმაც კაფეში დარჩენილი ზაზა გოროზია, დავით საყვარელიძე, გიორგი ვაშაძე და სხვა „ნაციონალები“ ჯერ სიტყვიერად „შეამკეს“, შემდეგ კი მათ შორის ხელჩართული ჩხუბი გაიმართა, რის შემდეგადაც დეპუტატებმა სხვადასხვა დაზიანება მიიღეს - გიორგი ვაშაძეს თავში მიაყენეს ჭრილობა, ზაზა გოროზიას მარჯვენა მკლავი მოტეხეს, ხოლო დავით საყვარელიძეს დანით აქვს მიღებული ჭრილობები სახისა და მკლავის არეებში.
ამ ინციდენტს გოგა ხაჩიძეც გამოეხმაურა, რომელმაც „ფეისბუქზე“ შემდეგი სტატუსი გააზიარა - „გოროზად დაესხნენ, საყვარლად სცემეს, ვაშა!..“
ქეთი მელაძე
სპეციალურად „რეიტინგის“ საიტისთვის
