ქართველი დიზაინერები, ჯერ კიდევ ოქტომბრამდელი შიშით რომ ცხოვრობენ, პირველი ლედის ჩაცმულობის გაკრიტიკებას მაინც ვერ ბედავენ. საქართველოს პირველი ლედი სანდრა რულოვსი ხშირად გამხდარა ჭორების ობიექტი, მაგრამ, მიუხედავად ამისა, მოსახლეობის დიდი ნაწილის სიმპათიას ყოველთვის იმსახურებდა. ჰოლანდიელი ქალბატონი, რომელიც რამდენიმე უცხოური ენის გარდა ქართულს და მეგრულსაც დაეუფლა, ხშირად აღიქმებოდა ყველაზე გაწონასწორებულ, სადა და უბრალო პირველ ლედიდ. გარედან ისე ჩანდა, რომ სანდრა არასოდეს ერეოდა ქვეყნის მართვაში, ამის გამოცდილება კი უახლოეს ისტორიაში ბევრი გვაქვს.

სანდრა რულოვსი ხშირად მონაწილეობდა სხვადასხვა საქველმოქმედო ღონისძიებაში, ექთნის კურსები გაიარა და ერთ-ერთ საავადმყოფოში მედდად მუშაობდა.

ბოლო წლებში ბევრჯერ აუმხედრდა საკუთარი მოსახლეობა მოქმედ პრეზიდენტს და უამრავი აქცია გაიმართა მისი გადაყენების მოთხოვნით. მაშინ ხუმრობდნენ კიდეც, მიშა წავიდეს და სანდრა დარჩესო, მაგრამ მიშა დარჩა და სანდრა უფრო ნაკლებად ჩნდებოდა კამერების წინ. ის პრეზიდენტს მხოლოდ უცხოეთში ახლდა ოფიციალური ვიზიტების დროს, ხანდახან საქართველოშიც, როდესაც პრეზიდენტი მოსახლეობის მოხიბვლას ცდილობდა. სანდრა არასოდეს გამოირჩეოდა პოლიტიკური განცხადებებით და ყოველთვის ჩრდილში დგომას ამჯობინებდა. 

დასაწყისში აღვნიშნეთ, რომ სანდრა რულოვსი ხშირად გამხდარა ჭორების ობიექტი. ძირითადად იმაზე ლაპარაკობდნენ, რომ სანდრა მშობლიურ ჰოლანდიაში დაბრუნდა და საქართველოში ჩამოსვლას აღარ აპირებდა. ამის მიუხედავად, ის მაინც ჩნდებოდა პრეზიდენტის გვერდით და ჭორების ნაკადიც წყდებოდა.

სადა, თავმდაბალი პირველი ლედი არასოდეს აქცევდა საკუთარ გარეგნობას დიდ ყურადღებას. ის მუდამ ერთი და იმავე ვარცხნილობით ჩნდებოდა, იშვიათად თმა ზევით ჰქონდა აწეული. სანდრა მაკიაჟს მსუბუქად, ან თითქმის არ იკეთებს, არც სამკაულებისადმი დიდი სიყვარულით გამოირჩევა. რაც შეეხება ჩაცმის სტილს, ეს თემა პირველი ლედის აქილევსის ქუსლი გახლავთ. მიუხედავად იმისა, რომ გემოვნებას მუდმივად უწუნებდნენ, ის არასოდეს გვახსენდება გამომწვევად ჩაცმული.

27 თებერვალს ბაქოში ოფიციალურ ვიზიტად მყოფი პრეზიდენტის ფოტოების გამოქვეყნებას სერიოზული სკანდალი მოჰყვა. იმ დღეს ორი ქვეყნის პრეზიდენტი ერთმანეთს მეუღლეების თანხლებით შეხვდნენ. აზერბაიჯანის პირველ ლედის მეჰრიბან ალიევას, რომელსაც ხშირად გემოვნების ეტალონად მიიჩნევენ და მართლაც ულამაზესი ქალბატონია, არც იმ დღეს უღალატა გემოვნებამ, მაგრამ რაც შეეხება სანდრა რულოვსს, მისი კაბის სიგრძე სერიოზული განსჯის საგანი გახდა.

დღემდე არავინ იცის, რა მოხდა მაშინ და რატომ ეცვა ოფიციალურ მიღებაზე ჩვენს პირველ ლედის მოკლე კაბა, შესაძლოა, სანდრას იმ დღეს ვარდისფერმა კაბამ უღალატა, მაგრამ დღის ბოლოს „განჯლიკის“ სასახლეში, აზერბაიჯანის პრეზიდენტის და პირველი ლედის, მეჰრიბან ალიევას სახელით, მიხეილ სააკაშვილის და სანდრა რულოვსის პატივსაცემად გამართულ საღამოზე სანდრა შავი მოკლე კაბით და თეთრი მოსასხამით მიბრძანდა.

დრესკოდი, რომელიც იმ დღეს დაირღვა, დიდხანს იყო სოციალურ ქსელში განხილვის საგანი. ლამაზად ჩაცმული მეჰრიბანის ფონზე სანდრა რულოვსის კაბები მართლაც უმწეოდ გამოიყურებოდა. ფოტოები ბევრგან დაიბეჭდა, ინტერნეტშიც გავრცელდა, მაგრამ ქართველი დიზაინერები, ჯერ კიდევ ოქტომბრამდელი შიშით რომ ცხოვრობენ, პირველი ლედის ჩაცმულობის გაკრიტიკებას მაინც ვერ ბედავენ.

წამომიდგენია, რა რეაქცია მოჰყვებოდა, მსგავსი ჩაცმულობით ამერიკის ან რომელიმე წამყვანი ქვეყნის პირველი ლედი რომ დაეფიქსირებინათ. უცხოური მედია და ცნობილი დიზაინერები რჩევა-დარიგებით აიკლებდნენ კრიტიკის ობიექტს.

თუმცა არ ვიცით, რა მოხდა რეალურად, ქართული პრესის და სოციალური მედიის გამოხმაურებამ არგო თუ სანდრას ფოტოებზე საკუთარი თავი არ მოეწონა, ფაქტია, რომ ორი თვის შემდეგ, 8 მაისს, პრეზიდენტი ბაქოში ილჰამ ალიევის სახელით გამართულ სადილს დაესწრო, სადაც ორი ქვეყნის პრეზიდენტს მეუღლეებთან ერთად ისევ მოუწიათ შეხვედრამ.

მეჰრიბანი, როგორც ყოველთვის, არაჩვეულებრივად გამოიყურებოდა, სანდრა რულოვსი კი შავ-თეთრი უჯრებიანი კაბით და თეთრი მოსასხამით გამოცხადდა. რაც მთავარია, პირველი ლედის კაბა ამჯერად მუხლს სულ ოდნავ იყო აცდენილი და უფრო მეტიც, პრეზიდენტის „ფეისბუქის“ ოფიციალურ გვერდზე გამოქვეყნებულ ფოტოებზე, პირველი ლედი, მთლიანად მხოლოდ ერთგან ჩანს და ისიც მუხლებზე ჩანთა აქვს აფარებული.

სხვათა შორის, პრეზიდენტის ოფიციალურ გვერდზე გამოქვეყნებული ფოტოების დათვალიერებისას ისიც აღმოვაჩინეთ, რომ სანდრამ შავ-თეთრი უჯრებიანი კაბა ბაქოში ვიზიტამდე ორი დღით ადრე გრემში, სააღდგომო ლიტურგიაზეც მოიხდინა.

ქეთი მელაძე

ჟურნალი „რეიტინგი“