ბევრი ამბობდა, რომ ოთარი ექიმობასთან ერთად კარგი მსახიობიც გამოდგა, ბევრი იმასაც ამბობდა, ეგ კაცი ეგეთია, სულ არ თამაშობსო. ასე იყო თუ ისე, ახალბედა მსახიობი, მსუქანი ექიმი ირაკლი ჩხეიძე მაყურებელმა მალე შეიყვარა.
ექიმი ტატიშვილი
''ღამის შოუს'' სტუდიამ ჩათვალა, რომ ის კიდევ უფრო უნდა დაეტვირთა სატელევიზიო სივრცეში და ახალი გადაცემა ''ოთარ ტატიშვილის შოუ'' გაუკეთა. ამისთვის მსახიობმა წონა ისე დაიკლო, პიჯაკი რომ არა, ანორექსიას დავაბრალებდით.
მას მერე ბევრმა წყალმა (მთავრობამაც და ტელევიზიის ხელმძღვანელობამაც) ჩაიარა. ოთარი ყველა მათგანს კარგად მოერგო. იყო დრო, როცა ციყვის, დათვის, აღარც მახსოვს, კიდევ რომელი ცხოველის ფორმაში გვევლინებოდა და ცინიკურად მოიხსენებდა დღეს უკვე პრემიერ-მინისტრ ბიძინა ივანიშვილსა და მის გარემოცვას.
დღეს ''ნაცებს'' აქილიკებს, ''ქოცები'' გადაცემაში საპატიო ადგილას უზის და ხან ერთს, ხან მეორეს, ხან მესამეს ჯანდაცვის მინისტრის სავარძელს სთხოვს. ხუმრობით ალბათ (აი, ხუმრობა, ძმაო!), აბა, ის რა ხუმრობაა, ჟურნალისტს რომ მისწერ, დაიკიდე, რედაქტორი თუ გაწუხებსო. ვერ მიხვდით, ხომ? ახლავე მოგიყვებით.
მოკლედ, იმის გამო, რომ ამ ჩვენს სუპერმოცეკვავესა და ტელეწამყვანს დიდი ხანია პრესისთვის ინტერვიუ არ მიუცია და საკმაოდ ბევრი კითხვა დაგროვდა მასთან დაკავშირებით, გადავწყვიტეთ, დაგვერეკა და ინტერვიუ გვეთხოვა. პასუხი პირველ ზარზე:
- მოდი, გავიდეს ჯერ გადაცემა ეთერში (სეზონი ჯერ დაწყებული არ იყო), დავიქოქებით და მერე ჩავწეროთ. პასუხი მეორე ზარზე: - მოდი, კიდევ ორ გადაცემას შევხედოთ და მერე დამირეკე, უკაცრავად, რომ გალოდინებთო. მობოდიშება განსაკუთრებით მესიამოვნა და კვლავ მოთმინებით ველოდი შემდეგი ორი კვირა.მაგრამ მესამე ზარზე პასუხი ვერ მივიღე. ამიტომ მესიჯი მივწერე. ჩვენ შორის დაახლოებით ასეთი მიმოწერა შედგა.
- ბატონო ოთარ, შეგაწუხეთ ძალიან, მაგრამ რა ვქნა, მეც მაწუხებენ. როდის ჩავწეროთ დაპირებული ინტერვიუ?
- ვინ გაწუხებს?
- რედაქტორი.
- დაიკიდე, მთავარია, ალერგიამ არ შეგაწუხოს (იხუმრა. ავტ.).
ამით ჩვენი ''მოლაპარაკებები'' დასრულდა. სავარაუდოდ, ოთარმა ეს ხუმრობა გამოიმეტა ჩვენთვის ინტერვიუს სანაცვლოდ. არ ვიცი, რა აუვარდა ტელეწამყვანს თავში: დაკლებული კილოგრამები, ახალი სეზონი, ჟიურის წევრობა თუ გია სურამელაშვილთან მეგობრობა, მაგრამ ფაქტი ერთია, რაღაც ნამდვილად აუვარდა!
ამ წერილით ერთი რამის თქმა მინდა: ჩემო ძვირფასო რესპონდენტებო, ქართულ ენაში გვაქვს მეტისმეტად საჭირო სიტყვა ''არა'' , რომელიც უარყოფას ნიშნავს და სანამ ამდენჯერ დაარეკვინებთ ჟურნალისტს, ალოდინებთ კართან ან ტელეფონის ყურმილთან, ჯობს, გამოიყენოთ ეს სიტყვა და ზრდილობიანად თქვათ უარი, როგორც ამას აკეთებენ სხვა რესპონდენტები.
ამით საკუთარ დროსაც დაზოგავთ და ჩვენსასაც. არ ვიცი, სამედიცინო ენაზე ეს ''არა'' ითარგმნება თუ არა, მაგრამ სავარაუდოდ, ადრესატი გაიგებს.
ჟურნალი ''რეიტინგი''
დიჯეი ბუკლე
