დღეს მთელმა საქართველომ დამირეკა გასულ კვირას გავრცელდა ინფორმაცია, რომ მსახიობი გიორგი ვარდოსანიძე ''რუსთავი 2''-დან გამოუშვეს და მის მაგივრად გადაცემა ''გააცინე და მოიგეს'' ვახო ბიჭიკაშვილი წაიყვანდა. ინფორმაციის გადასამოწმებლად გიორგის რამდენიმე შეკითხვით მივმართე.

- გიორგი, გავრცელდა ინფორმაცია, რომ ''რუსთავი 2''-დან წამოხვედი, ''გააცინე და მოიგეს'' წამყვანი ახალი სეზონიდან ვინ იქნება?
- დღეს მთელმა საქართველომ დამირეკა. უკვე მეც ვხუმრობ, რომ წიხლით გამომაგდეს ''რუსთავი 2''-დან. გეტყვი, რომ ეს ყველაფერი ჭორია.
- ბოლო გადაცემა ვახო ბიჭიკაშვილს მიჰყავდა.
- ასე იმიტომ მოხდა, რომ მე ქვეყანაში არ ვიყავი. ვახო დამეხმარა და ჩემ მაგივრად ჩაწერა გადაცემა. მერე თორმეტი გადაცემა მე ჩავწერე, რომლებიც ეთერში ჯერ არ გასულა. ვახო მხოლოდ ერთჯერადად დამეხმარა.
- გასტროლზე იყავი წასული?
- არა, საქმიანი შეხვედრა მქონდა და უცხოეთში გახლდით.
- თავად ვახომ მაყურებელს დამშვიდობებისას უთხრა, შეგხვდებით მომდევნო სეზონშიო და ალბათ, ამან გააჩინა ეს შეკითხვები.
- არ ვიცი, ვახო მაყურებელს როგორ დაემშვიდობა, მაგრამ ფაქტია, რომ წამყვანი მე ვარ.
- რა შეიცვლება ახალი სეზონიდან ''გააცინე და მოიგეში''?
- ცვლილებები არ იგეგმება. უბრალოდ, შევეცდებით, მაყურებელი კიდევ უფრო გავახალისოთ.

დიჯეი ბუკლე
ჟურნალი ''რეიტინგი''