თეთრი ჩექმის ფასი ინტერნეტში დაახლოებით 43 დოლარია მუდმივად მიიჩნეოდა, რომ პოსტსაბჭოთა სივრცეში საუკეთესო გემოვნებით სწორედ ჩვენი ერის წარმომადგენლები გამოირჩეოდნენ. ქართველ ქალებს კარგად ჩაცმა რომ უყვართ, ეს ნამდვილად არ არის ახალი ამბავი, სხვების ჩაცმულობასაც დიდი სიამოვნებითა და ენთუზიაზმით არჩევენ. განსაკუთრებული ყურადღების ცენტრში არიან შოუბიზნესის წარმომადგენლები, მომღერლები თუ მსახიობები, ასევე პოლიტიკოსი ქალებიც.



ბოლო დროის ინტერნეტვარსკვლავი ამ მიმართულებით ერთმნიშვნელოვნად ადვოკატი ეკა ბესელიაა, რომელმაც მცირე ხნის წინ თეთრი ბეწვიანი პალტოთი და ბეწვითვე გაწყობილი თეთრი ჩექმებით გაიბრწყინა. ეს ფოტო მას შემდეგ გავრცელდა, რაც ალილოზე პარლამენტთან მისულ ხალხს, დავით უსუფაშვილსა და სხვა დეპუტატებთან ერთად, ბესელიაც გამოეგება ნუგბარით ხელში. ფოტომ ისეთი სისწრაფით მოიარა ინტერნეტი, რომ ქალბატონმა ეკამ, ალბათ, ჩაჩაჩული ჩექმის გასწორებაც ვერ მოახერხა.



რასაკვირველია, განსაკუთრებით ამ ფოტოთი ნაციონალებმა და მათმა მომხრე ქალბატონებმა გაიხარეს. გამორჩეულად თამარ ჩერგოლეიშვილმა, რომელიც, უნდა ვაღიაროთ, ჩაცმის განსაკუთრებული სტილით არის ცნობილი. ის ეკა ბესელიას თეთრმა ლუქმა დილიდან ძალიან ცუდ განწყობაზე დააყენა და ამის თაობაზე ''ფეისბუქზე'' დაიჩივლა.



ჩერგოლეიშვილს არც ნაციონალი მამაკაცები ჩამორჩნენ და კოლეგა ქალბატონს ''დითირამბები'' მიუძღვნეს, გოგა ხაჩიძემ ერთსტროფიანი ლექსი დაუწერა, ხოლო ნიკა მელიამ მის ჩექმებს ''ბესელკები'' უწოდა. როგორც ცნობისმოყვარეებმა გამოარკვიეს, თეთრი ჩექმის ფასი ინტერნეტში დაახლოებით 43 დოლარია. მოკლედ, ინგლისური ენის ცნობილი სკანდალი ახალმა სკანდალმა გადაფარა და როგორც ჩანს, ''ოცნების'' ერთ-ერთი აქტიური სახე არც მომავალში მოგვაწყენს.



უცნობია, ჰყავს თუ არა ეკას დიზაინერი და როგორ არჩევს სამოსს, თუმცა, ჟურნალისტებს გვახსოვს, ჯერ კიდევ ადვოკატობიდან მოყოლებული, თავისებური ჩაცმულობით, ასევე სამკაულებით გამოირჩეოდა. ერთადერთი, რაც ამდენი წლის განმავლობაში უცვლელი დარჩა, ეს ბესელიას ვარცხნილობაა. ცნობილია მისი სიყვარული ქურქების მიმართ, ასევე ძალიან მოსწონს სხვადასხვა ტიპის პიჯაკი. რაც შეეხება სამკაულებს, დიდი ზომის აქსესუარების მორგება აშკარად მისი გატაცებაა.



გთავაზობთ, ერთად გადავავლოთ თვალი ეკა ბესელიას ბოლოდროინდელ ფოტოებს.

დიჯეი ''ბუკლე''
ჟურნალი ''რეიტინგი''