მალე მთელი დარბაზი ერთხმად მღეროდა ნინოს სიმღერებს. ნინო ქათამაძე რომ რუსეთსა და უკრაინაში ძალიან უყვართ, ახალი ამბავი აღარ არის. ბოლო დროს რუსულ კონკურსებსა და შოუებზეც მოხშირდა ნინოს სიმღერები, რომლებსაც კონკურსანტები მღერიან ან ჟიურის წევრები ღიღინებენ და ერთმანეთს ეჯიბრებიან ნინოს სიმღერების უკეთ ცოდნაში. ალბათ მიხვდით, აჩი ფურცელაძის შარშანდელი გამოსვლა გავიხსენე რუსულ „ახალ ხმაზე“. შესაბამისად, ნინო რუსეთში აქტიურად მოღვაწეობს და სხვადასხვა ღონისძიებაშიც მონაწილეობს. ბოლოს 30 აპრილს რუსეთის ქალაქ ტულაში გამართა კონცერტი, მანამდე კი მურმანსკს სტუმრობდა.

რუსეთში ნინოს რთულ, არაორდინარულ, „კოსმოსურ“ და იდუმალ მომღერალს უწოდებენ. მისი მუსიკა ხომ ძნელია, რომელიმე გარკვეულ ფორმატს მოარგო: ჯაზიც არის, როკიც, ეთნოც. ყოველთვის ბოლომდე იხარჯება, ენერგიითა და ემოციებით არის სავსე და ამიტომაც უყვართ რუსეთშიც.

- მომენატრა თქვენი სითბო, - უთხრა ნინომ მაყურებელს სცენიდან და რამდენიმე კომპოზიცია ოვაციების თანხლებით შეასრულა. აქტიურად ურთიერთობდა პუბლიკასთან, როგორც ყოველთვის. მერე კი კიდევ მეტად გააოცა მაყურებელი - დარბაზში ჩავიდა, შუქის ჩართვა ითხოვა, რიგებს ჩამოუარა და მაყურებლებთან ერთად მოჰყვა იმპროვიზაციებს. მალე მთელი დარბაზი ერთხმად მღეროდა ნინოს სიმღერებს. კონცერტის შემდეგ მაყურებლები ძლივს დაიშალნენ, ისე არ უნდოდათ წასვლა. რუსები ერთმანეთის მიყოლებით იმეორებდნენ, რომ მათი საყვარელი მომღერალი სწორედ ქართველი ნინო ქათამაძეა, რომლის გამოსვლისას ტიროდნენ კიდეც.

ტულის შემდეგ ნინოს კიდევ აქვს კონცერტები ჯერ რუსეთის ქალაქებში, მერე კი ევროპისა და აზიის ქვეყნებში. როგორც ერთმა რუსმა ჟურნა-ლისტმა თქვა, ჯაზს თარგმანი არ სჭირდება და მით უმეტეს, ნინოს ჯაზსო.

ჟურნალი „რეიტინგი“