რადიო ''იმედში'' დილის გადაცემის წამყვანად ვმუშაობ, ამიტომ ადრე ადგომა მიწევს, მაგრამ ამასთან შეგუება დიდად არ გამჭირვებია. ''დილა იმედისას'' მე,
საღამოს ჩემთან მეგობრები მოდიან, ჩემი ახალი ბინა ჩვენი თავშეყრის ადგილად იქცა. გარდა ამისა, ხან კონცერტი მაქვს, ხან სხვების კონცერტზე დავდივართ, ხან კინოს ან თეატრს ვსტუმრობთ და ასე გადის დრო. ისე, ჩემთანაც ხშირად ვაწყობთ კი-ნოჩვენებას, ვიკრიბებით, ვუყურებთ და მერე განვიხილავთ ხოლმე.
ნამზეური და ვარჯიში...
...ზამთარში ისეთი ფერი ვიყავი, ყველას თვალში ვხვდებოდი, ეს ეგვიპტისა და სოლარიუმის დამსახურება იყო. ჩემგან იმდენად მიეჩვივნენ არანორმალურ სიშავეს, რომ ამ ეტაპზე რა ფერზეც ვარ, ეს არაფერია, არადა, თეთრი ნამდვილად არ ვარ, კარგად გახლავართ შეფერილი. ძალიან მინდოდა, ფიზიკურად დავტვირთულიყავი, დავიწყე ვარჯიში, მაგრამ ჩემი რეჟიმიდან გამომდინარე, ერთ თვეში თავი დავანებე, მერე, როცა გრაფიკიდან ამოვვარდი, ვეღარ გავაგრძელე. ახლა მე და ჩემმა მეგობარმა გა-დავწყვიტეთ, იოგაზე ვიაროთ, მთელი ივლისი აქ მიწევს ყოფნა და ჩავერთვები ამ სფეროში. ისეთი კარგი ფოტოები ვნახე, ისე კარგად ფლობენ სხეულს იოგას მიმდევრები, რომ მომინდა, მეც გავხდე მათი წევრი. ალბათ სასწაულებს ვერ მივაღწევ და ნირვანაში ვერ ჩა-ვვარდები, მაგრამ იმედია, რაღაც მაინც გამომივა, თან ცხოვრების ასეთი წესი ჯანმრთელობისთვისაც სასარგებლო ყოფილა.
ახალი ბინა
...მშენებარე ბინა ვიყიდე, ცოტა ხნის წინ დასრულდა, ნელ-ნელა გავარემონტე და გადავედი კიდეც. ექვსი თვე მოვუნდი რემონტს, არ ავჩქარდი, რათა ის მომეღო, რაც ნამდვილად მინდოდა და მომწონდა. ბოლომდე კმაყოფილი არავინ არაფრით არის, მაგრამ საერთო ჯამში, მაინც კმაყოფილი ვარ. ვინც მოდის, ყველა ამბობს, რომ თავს კარგად გრძნობს და აღნიშნავს, რომ კარგი აურაა. ამასთან, ჩემი ბინა არ არის მხოლოდ ერთი ადამიანის გემოვნების შედეგი, რამე სპეციფიკური არ გამიკეთებია, უფრო თანამედროვე სტილშია გადაწყვეტილი. რემონტი ფინანსური თვალსაზრისით დამოუკიდებლად გავაკეთე, ალბათ ამიტომაც მოვანდომე ამდენი ხანი. მართალია, მარტო ვცხოვრობ, მაგრამ ჩემი დიეტებიდან გამომდინარე, გაზქურასთან დიდხანს ყოფნა არ მიწევს, თანაც ჩემს სადარბაზოში სულ ხუთი თუ ექვსი ოჯახი ვართ შესახლებული, ჯერ ბუნებრივი აირი არ გვაქვს შემოყვანილი, ამიტომ მიკროტალღურ ღუმელს ვიყენებ. თუ არადა სალათებს ვამზადებ, რაც ძალიან მიყვარს. თან აღმოჩნდა, რომ გემრიელად კეთებაც შემძლებია. თუ ვინმე მოდის ჩემთან, რეკავს და მეუბნება, შენი სალათა გააკეთეო, რომელიც ბოსტნეულისგან, სალათის ფურცლებისგან, კიტრისა და პომიდვრისგან მზადდება. ჩემი აუცილებელი ატრიბუტია ბალზამიკოს ძმარი და ზეთი, რადგან არ მიყვარს მაიონეზი, თან სალათი ხომ მსუბუქი საჭმელია, არ უნდა დაგამძიმოს. ამას ვამატებ მწვანილს და სასალათე თინუსს, შედეგად კი არაჩვეულებრივი გამოდის. გარდა დიასახლისობისა, ასევე მიყვარს ბინის გულიანად დალაგება. მიუხედავად იმისა, რომ ოროთახიანია და სულ 55 კვადრატული მეტრია, მის დალაგებას შეიძლება ხუთი საათი მოვანდომო.
- რამდენადაც ვიცი, აქამდე დეიდასთან ცხოვრობდი, მარტოობას როგორ ეგუები?
'' ვინ დამტოვა მარტო, ჩემო კარგო, ვინ? ძალიან არ მინდა, რომ მარტო ვიყო, ალბათ შემეშინდება კიდეც, რადგან მშიშარა ვარ. საბედნიეროდ, ჩემი დაქალები სულ ჩემთან არიან, ხშირად რჩებიან კიდეც. რამდენიმე დღის წინ დაბადების დღე მქონდა და ჩემი და და დისშვილები ჩამოვიდნენ. ისე კი ჩემი დაქალებიდან ერთ-ერთი ყოველთვის რჩება ჩემთან.
შოპინგი
...მას შემდეგ, რაც ახალ ბინაში გადმოვედი, ბევრი საოჯახო ნივთი გამიხდა შესაძენი და პირადად ჩემთვის რაღაცების ყიდვისგან თავს ვიკავებდი, შოპინგს მოვუკელი, თუმცა მეგობრები დამიდგნენ ამ მხრივ გვერდით. ახალ ბინაში რომ გადმოვედი, მოვიდნენ, დაათვალიერეს, მკითხეს რა მაკლდა და შემდეგ ისე დამასაჩუქრეს. მგონი მოგატყუე, როცა ვთქვი, შოპინგს მო-ვუკელი-მეთქი, რადგან ზეგ გოგონები თურქეთში საყიდლებზე მივდივართ.
სალომე მძღოლი
...დიდი ხანია საჭესთან ვზივარ, ახლაც ''ბრავოში'' მოგებული მანქანით ვმოძრაობ. რაც შეიძლება დღის განმავლობაში დამჭირდეს, ყველაფერს მანქანაში ვაწყობ, ამიტომ დიდად მოწესრიგებული არაა ჩემი მანქანის უკანა სავარძელი. რაც შეეხება მძღოლობას, მგონი, ნორმალური მძღოლი ვარ. თუ პარკირებას არ ჩავთვლით, შეიძლება ითქვას, რომ პატრულთან სხვაგვარი შეხება არ მქონია... თუმცა გამახსენდა, ერთხელ არასწორად შევუხვიე, მივხვდი ჩემს დანაშაულს და ბოდიშიც მოვუხადე, ავუხსენი, რომ არ ვიცოდი, თუ შეხვევა არ შეიძლებოდა და დამინდეს.
საზაფხულო გეგმები
...ჯაზფესტივალზე მინდა წავიდე და ელ ჯეროს მოვუსმინო. გარდა ამისა, არის კიდევ რამდენიმე საინტერესო ჯგუფი, რომელთა გამოსვლების ნახვას ვაპირებ, მაგრამ როცა ელ ჯერო შენს ქვეყანაში ჩამოდის, უნდა ნახო და აუცილებლად დააფასო. აგვისტოში წავალ ზღვისპირეთში, თუმცა სამეგობრო ვგეგმავთ საზღვარგარეთ გამგზავრებასაც და ვნახოთ, როგორ მოგვემართება ხელი.
ტაბუდადებული პირადი ცხოვრება
- თბილისში ჭორები გავრცელდა, რომ შეყვარებულს დაშორდი, იქნებ დაუსვა წერტილი ამ მითქმა-მოთქმას და გაამხილო, რა ხდება შენს პირად ცხოვრებაში?
- არაფერს არ ვიტყვი, არ მინდა ამ თემაზე ლაპარაკი, არც არავის გასაჩუმებლად არ ვაპირებ ამ თემაზე საუბარს.
სასიმღერო კარიერა
...ძირითადად საკლუბო რეპერტუარზე ვმუშაობ, რაიმე განსაკუთრებულს არ ვაკეთებ. კლიპზე მუშაობა დავიწყე მეგობრული საწყისებით, მაგრამ მერე გავჩერდი. არ ვიცი რატომ, მგონი, ცოტა ხნით ბინამ შემაჩერა, მაგრამ აუცილებლად მინდა რაიმე ახლის გაკეთება. გარდა ამისა, ჩავწერე დუეტი მერაბ სეფაშვილთან, რომელიც დათო არჩვაძის დისკში შევიდა, ასევე ''ქართულ ხმებთან'' გავაკეთე სიმღერა ''კესარია'' , რომელიც ჯერ არ გამოსულა.
ციცი ომანიძე
ჟურნალი ''რეიტინგი''
