ბიუსტჰალტერსა და გრძელ კოსტიუმში გამოსულმა მომღერალმა მაყურებელი დაშოკა უცხოელი ვარსკვლავები სცენაზე ლამის შიშვლები რომ გამოდიოდნენ, კოსტიუმებსა და საღამოს კაბებში გამოწყობილი ქართველები გიტარით ხელში მღეროდნენ. კლიპებში კი მთაწმინდიდან ან მეტეხიდან ''მიმართავდნენ ბებერ თბილისს''. ბოლო ათწლეულია, ყველაფერი შეიცვალა და ქართველებიც გათამამდნენ; რაც, პირველ რიგში, ჩაცმულობაში გამოიხატა.

მათ შორის პირველი იყო ლელა წურწუმია. 2000-იან წლებში ფილარმონიის სცენაზე ბიუსტჰალტერსა და გრძელ კოსტიუმში გამოსულმა მომღერალმა მაყურებელი დაშოკა. შემდეგ წლებში ლელამ აღიარა, რომ მის ამ ნაბიჯს მოძღვარი სიხარულით არ შეხვედრია, მაგრამ ფაქტია, რომ სცენის სკანდალებს შორის პირველად ლელა გვახსენდება.



არ გაუხდია და სკანდალურიც არაფერი გაუკეთებია, მაგრამ აჩი მეფარიძის კოსმონავტის მსგავსი ჩაცმულობა სცენასა თუ კლიპებში ნამდვილი აღმოჩენა იყო მისი ფანებისთვის. თეთრ ტანსაცმელში კარგად შეფუთული აჩი, როგორც ჩანს, სპეციალურად სცენისთვის გამოეწყო ასე და მაყურებელიც მშვენივრად ''წამოიკიდა'', შემდეგ წლებში იუმორისტული შოუებისთვის კარგი ''საკბილოც'' დატოვა.



ქართული სცენის მეფე არ ბერდება და არც არასოდეს დაბერდება... იმედია, არწივში არ აგერიათ და თემურ წიკლაური არ გეგონათ. სიას უბერებელი მერაბ სეფაშვილით გავაგრძელებთ. ტყავის ქურთუკი, წაწვეტებული ფეხსაცმელი, თხელი შავი ბრჭყვიალა ზედა, რომელიც მისი კონცერტებისა თუ კლიპების განუყრელი ნაწილია, საშუალებას გვაძლევს ვთქვათ, რომ, ერთი რეკლამის არ იყოს, მერაბი მოდას არ ემონება და აშკარად საკუთარი სტილი აქვს.



მერაბ სეფაშვილისგან განსხვავებით, მოდას ნამდვილად ემონება ანზორი, იგივე ბიჭოლა. დიზაინერი, რომელიც თავისი მრგვალი ფორმებით ყულაბის კეთილ პერსონაჟს მოგაგონებთ, ყოველთვის ახერხებს, რომ ექსტრავაგანტური ჩაცმულობით ხალხის ყურადღება მიიქციოს.



თავთუხისფერი დალალები არ აქვს, მაგრამ მოშვილდული წარბებით თავს იწონებს მარკუს მეტრეველი. თეთრი სამოსი ძალიან უყვარს, ამიტომ ქუჩაში შემთხვევით თუ შეგხვდათ, არ გესიზმრებათ, ნამდვილად ის არის და არა ალილოს მონაწილეებთან შესახვედრად გამოსული ეკა ბესელია.



მოდის დედა და მეტრი დალი ჩიტალაძე, რომელთანაც ყველა ინტერვიუ იმით იწყება, რომ წლების წინ ''ვერსაჩესთან'' მუშაობდა, თბილისის მოდის კვირეულზე ისეთი ჩაცმულობით გამოცხადდა, აჩი მეფარიძის ქვედაბოლოც კი დაჩრდილა.



მოდის ქალიშვილად მიაჩნია თავი მერსი სულხანიშვილს, მაგრამ ყველას კარგად ახსოვს, რომ მისი კარიერა მხარზე საბურავის შემოგდებით დაიწყო. ერთ-ერთ საღამოზე მელიის ტყავით მისული ტელეწამყვანი ცხოველთა დამცველებისთვის ინსპირაციის წყარო გახდა. ყველამ ერთხმად აღიარა, რომ გოგონამ მელიის ბეწვით ამ შემთხვევაში გემოვნების მწვერვალები ვერ დაიპყრო, თუმცა ეს ის თემაა, რომელზეც არ უნდა იდავო.



ის ხან გოჩა ჩერტკოევის შვილიშვილია, ხან ფსიქოლოგი, ხან წარსულში ცნობილი მკითხავი, მაგრამ ფაქტია, რომ უფრო ხშირად ეპატაჟურ განცხადებებზე სკანდალურად მისი ჩაცმულობა გამოიყურება. მზესუმზირები, გადაპარსულ თავზე ტატუ, მძივები, ბეჭდები, ცხოველები, ყველაფერი ერთად გია ჯაჯანიძის, იმავე ჯაჯოს იმიჯის ნაწილია.



ვარცხნილობების შეცვლა, ჟურნალისტიკასთან ერთად, მისი საყვარელი საქმეა. ინგა გრიგოლია მოდას ფეხდაფეხ მისდევს და მართალია, მისი ჩაცმის სტილი არ იცვლება, ვარცხნილობასთან დაკავშირებით სულ სხვა სურათი გვაქვს. იყო დრო, როდესაც თავზე წნული ჰქონდა შემოხვეული. ის დროც გვახსოვს, დაგრძელებული კულულებით ეკრანიდან რომ გვიღიმოდა, მაგრამ ბოლოს დამოკლებულ თმაზე ჩატარებულმა ექსპერიმენტებმა ყველანაირ მოლოდინს გადააჭარბა.



კახი კალაძეს გასულ კვირას ლამბერსექსუალის ტიტული მიანიჭეს. მამაკაცი შეშის მჭრელის ჩაცმულობით, მაგრამ სუფთა და მოვლილი – ასეთია კახის ახალი სტატუსის განმარტება, თუმცა საზოგადოებას კარგად ახსოვს, წითელ შარვალში გამოწყობილი, უწინდებო კალაძე. ფოტო, რომელმაც წლების წინ ხალხს ლამის ''ეროვნული ღირსება შეულახა''.

ქეთი მელაძე
ჟურნალი ''რეიტინგი''