''უმუსიკოდ ერთი დღე არ შემიძლია''
- სოფო, მშობლების გაცნობისა და სიყვარულის ამბავი თუ იცი?
- მხოლოდ ის ვიცი, რომ დედა ერთ-ერთი მოგზაურობიდან ჩამოვიდა, გაიცნო მამა და მერე
- ალბათ, მამა თავიდანვე მოიხიბლა დედის სიმღერით.
- მამა დედას პროდიუსერი იყო და ალბათ, მოიხიბლა. მათი სიყვარულის ამბავი დაწვრილებით არ ვიცი. რაც უნდა გასაკვირი იყოს, მათთვის ეს ამბავი არასდროს მიკითხავს.
- ''X ფაქტორში''მონაწილეობის განმავლობაში შენი გვარის გამო სულ ჩნდებოდა კითხვა, იყავი თუ არა ყოფილი პრეზიდენტის ნათესავი. ბევრჯერ გითქვამს, რომ ყოფილ პრეზიდენტს არც იცნობ. დაინტერესებულხარ როდისმე, ნათესავები ხომ არ ხართ?
- პირადად მე არ გამომიკვლევია. შეიძლება, მიხეილ სააკაშვილი იყოს ჩემი შორეული ნათესავი. ამ ინფორმაციის მოძიებით არასდროს დავინტერესებულვარ და მგონია, რომ არც არასდროს დავინტერესდები. მე პირადად მნიშვნელობას არ ვანიჭებ, ადამიანი რა გვარია. მაინტერესებს, როგორი ადამიანია და რას წარმოადგენს. შეიძლება, მხოლოდ იმით დავინტერესდე, რისი ნიჭი აქვს. ზოგჯერ ყოფილი პრეზიდენტის შვილობასაც მაწერენ. არ ვარ და რა გავაკეთო? ჯობს, ამ ყველაფერს ერთხელ და სამუდამოდ გაეცეს პასუხი. ყოფილ პრეზიდენტთან არც ურთიერთობა და არც ნათესაური კავშირი არ მაქვს.
- მშობლები, როგორც ვიცი, მალევე დაშორდნენ ერთმანეთს.
- სამი ან ოთხი წლის ვიქნებოდი, როდესაც დაშორდნენ, თუმცა მამასთან კარგი ურთიერთობა მაქვს. ახლახან და შემეძინა. ''X ფაქტორში''სანამ დაგვაბრუნებდნენ, იმ საღამოს დაიბადა. სალომე მალე ერთი თვის გახდება. ჩემს ძმასაც ხშირად ვნახულობ. როგორც კი დროს გამოვნახავ, ვცდილობ, მოვინახულო. სალომეს დახვეწილი სლავური ცხვირი აქვს. უკრაინელი დედა ჰყავს, ნარევები ხომ ყოველთვის კარგები გამოდიან და სალომეც ძალიან ლამაზია. დედასაც აქვს მეორე ოჯახი.
- როგორც ვხდები, არ გიჭირს ორივე მშობელთან ურთიერთობა.
- არა, რატომ უნდა მიჭირდეს. ეს ჩვეულებრივი მომენტია. ადამიანებს უყვარდათ ერთმანეთი, შექმნეს ოჯახი და მერე დაშორდნენ. ეს ყველაფერი საუკუნის წინ მოხდა. ჩემთვის ეს დრო საუკუნეს უდრის, რადგან ცხრამეტი წლის ვარ და ჩვიდმეტი წლის წინ დაშორდნენ. ორივეს თავისი ოჯახი აქვს. მეც უკვე იმ ასაკში ვარ, რომ ჩემი ცხოვრება მაქვს.
- შემდეგი ფოტო ვისთან ერთად გაქვს გადაღებული?
- ჩემს ბიძაშვილთან ერთად. ის ჩემზე უფროსი იყო და ყოველთვის ცდილობდა, ჩემთვის რეალობა დაენახვებინა. მაგალითად, პირველად მან მითხრა, რომ თოვლის ბაბუა არ არსებობდა. სიმართლის მოსმენა ადვილი არ იყო, მაგრამ ასეთია რეალობა.
- ბავშვობისდროინდელი ფოტოებიდანვე ჩანს, რომ ყოველთვის მომღერლობა გინდოდა. ბევრი ფოტო გაქვს სცენაზე გადაღებული.
- კი, თუმცა სხვა პროფესია ავირჩიე, მაგრამ მგონია, როცა გემღერება, უნდა იმღერო და მეც როცა მემღერება, ვმღერი. Uუმუსიკოდ ერთი დღე არ შემიძლია. სულ რაღაცის ძიებაში ვარ. ორი-სამი დღე მუსიკას რომ არ მოვუსმინო, უკვე ვხვდები, რომ რაღაც ძალიან მაკლია. მერე აუცილებლად უნდა ავინაზღაურო და 24 საათი სულ ვმღერი.
- მომდევნო ფოტო კი, როგორც მითხარი, საბავშვო ბაღში გაქვს გადაღებული.…
- ეს ბიჭები ტყუპი ძმები არიან. ორივესთან ვმეგობრობდი. ახლა აღარ ვურთიერთობთ. სამწუხაროდ, გვარები და სახელები არ მახსოვს, რომ მოვძებნო და მათთან ურთიერთობა გავაგრძელო. ძალიან საყვარლები იყვნენ. ორივეს მოვწონდი და მახსოვს, ჩემ გამო ჩხუბობდნენ. საბავშვო ბაღში ბევრს ვუყვარდი. ხშირად იყო ჩხუბი ჩემ გამო.
- ახლა შენ გამო ბიჭები აღარ ჩხუბობენ?
- ახლა ერთმანეთს არ იცნობენ, თორემ შესაძლებელია, იჩხუბონ (იცინის).
''ვერც მივხვდი, ქართველი ხალხი რას აქცევს ყურადღებას და რას აფასებს''
- მომდევნო ფოტო ბოლო ზარზე გაქვს გადაღებული. რომელი სკოლა დაამთავრე?
- თავიდან 51-ე სკოლაში შევედი. მერე 161-ე სკოლაში ვსწავლობდი, ბოლო სამი თვე 103-ე სკოლაში გადავედი და ეს სკოლა დავამთავრე, მაგრამ თავს 161-ელად მივიჩნევ.
არ მოგატყუებთ და არ ვიტყვი, რომ ათოსანი ვიყავი. ჰუმანიტარული საგნები უფრო მიყვარდა და უფრო ადვილადაც ვიმახსოვრებდი. ტექნიკური საგნები ჩემი არ იყო და არც მქონდა მაინცდამაინც კარგი ქულები. შეიძლება ითქვას, ნორმალურად ვსწავლობდი. არც ოროსანი ვიყავი და არც ათოსანი. სწავლას თავს ნამდვილად არ ვაკლავდი.
- მომდევნო ფოტო კი ბერა ივანიშვილის სტუდიაში გაქვს გადაღებული, სადაც ერთად სწავლობდით შენ, ნუცა ბუზალაძე, ნინა სუბლატი...
- ჩვენთან ერთად სწავლობდნენ ეკა ბალანჩინი და ნინი სუხიტაშვილი, ერთი გამოშვება ვართ. წელიწადზე მეტი ერთად ვიყავით სტუდიაში და უცხოელი პედაგოგებისგან ბევრი რამ ვისწავლეთ.
- ფოტო პროექტ ''X ფაქტორში''მონაწილეობის დროს გაქვს გადაღებული. შენი აზრით, პროექტში რატომ ვერ გაიმარჯვე?
- მაყურებელმა საკონკურსო ამპლუაში მიხილა და მგონია, რომ ამ მხრივ ჩემი მაქსიმუმი გავაკეთე. ვოკალურად საკმაოდ რთული სიმღერები შევასრულე. სცენაზე ვიცეკვე, პერფორმანსიც გავაკეთე, ფორტეპიანოზეც დავუკარი და ვიმღერე. ამ ყველაფერს საქართველოში ბევრი ვერ აკეთებს. ერთი შეხედვით ეს ყველაფერი ადვილია. ცალკე ვუკრავ ფორტეპიანოზე, მაგრამ ბენდთან ერთად რომ დამეკრა, რამდენიმე დღე თავაუღებლად ვრეპეტიციობდი. სამწუთიან ნომერში უზარმაზარ სამუშაოს ვდებდით. სცენაზე ბევრი ამ ყველაფერს ვერ აკეთებს. ერთად ცეკვისა და სიმღერისას, მისამღერის მერე სუნთქვა აღარ ჰყოფნით. სამწუხაროდ, ამას საქართველოში დიდ ყურადღებას არ აქცევენ. თუ სიმართლე გაინტერესებთ, გეტყვით, რომ ვერც მივხვდი, ქართველი ხალხი რას აქცევს ყურადღებას და რას აფასებს. კარგად მღერი, არ მოსწონთ, ცუდად თუ იმღერებ, ხომ საერთოდ არ მოეწონებათ. ცეკვავ, ამბობენ, მერე რაო და თუ დაუკარი, მაგაზეც ამბობენ, ასე ხომ ყველა უკრავსო. კონკურსი რომ გაგრძელებულიყო, უფრო ბევრ რამეს ვისწავლიდი, მაგრამ რაც ვიმღერე, ვფიქრობ, ჩემი მაქსიმუმი ჩავდე. როგორც მუსიკოსს, მომღერალსა და არტისტს, ჯერ მე არაფერი გამიკეთებია.
- მომდევნო ფოტო ამერიკაში ყოფნის დროს გაქვს გადაღებული, როგორც ვიცი, აპირებ, პროფესიულად გაიზარდო და ამერიკაში წახვიდე.
- ამერიკაში დიდი ხნით მინდოდა წასვლა, მაგრამ ''X ფაქტორის''ყველა ფინალისტს ლონდონში წასვლისა და სწავლის შესაძლებლობა მოგვცეს. თუმცა ამერიკაში მაინც გავემგზავრები. ვეცდები, ლონდონიდან ნიუ-იორკში წავიდე და ჩემი საქმიანობა გავაგრძელო.
- შენს პირად ცხოვრებაში რა ხდება?
- ჩემს პირად ცხოვრებაში სერიოზული არაფერი ხდება.
- არც არასდროს ყოფილხარ შეყვარებული?
- სკოლის პერიოდში ვიყავი გატაცებული, თუმცა დიდხანს არ ვყოფილვარ ამ მდგომარეობაში. მაშინ თხუთმეტი წლის ვიყავი. ამ ასაკში სიყვარულზე რომ ილაპარაკო, რთულია. მივიჩნევ, რომ შეყვარებული არ მყოლია.
- გიფიქრია, როგორი გინდა, იყოს შენი მომავალი მეუღლე?
- მეუღლეზე არ მიფიქრია, მაგრამ შეყვარებული როგორი იქნება, ამაზე დავფიქრებულვარ. მე და ქმრობა და ცოლობა ძალიან შორს ვართ ერთმანეთისგან. ახლო მომავალში დაოჯახება ჩემს გეგმებში არანაირად არ შედის. კარიერისტი ვარ და მინდა, რაც შეიძლება ბევრს მივაღწიო. შეყვარებული შეიძლება გყავდეს, მაგრამ ეს საქმეში ხელს ვერანაირად ვერ შემიშლის. ოჯახი კარიერას ხელს ნამდვილად უშლის, რადგან სხვა ვალდებულებები გეკისრება. თან, თუ შენი მეორე ნახევარი შენივე სფეროდან არ არის, პრობლემები მაგ შემთხვევაში უფრო ჩნდება.
- მითხარი, სხვა პროფესია მაქვსო. მუსიკა რატომ არ აირჩიე პროფესიად?
- საერთაშორისო ურთიერთობებზე ვსწავლობ. პირველი კურსი დავხურე და მეორეზე გადავედი. დიდი შანსია, პროფესია შევიცვალო, ჯერ დარწმუნებული არ ვარ, ვფიქრობ, მთელ ჩემს მომავალს მუსიკას დავუთმობ.
მერი კობიაშვილი
ჟურნალი ''რეიტინგი''
