დარიამ თბილისის 55-ე სკოლაში ოთხი წელი ისწავლა, შემდეგ კი მამიდამ, ნინო სუხიშვილმა საცხოვრებლად და სასწავლებლად ამერიკაში წაიყვანა.
დარია ნინოს დედას ეძახის და ამას ყველა ინტერვიუში აღნიშნავს. „ნინო ჩემთვის როგორც დედა, ისეა. ის მივლის, მან წამიყვანა ამერიკაში, მიმიყვანა სკოლაში. ნინომ მასწავლა ინგლისური, დამეხმარა ყველაფერში. უდიდესი ამაგი აქვს ჩემზე. სანამ ნინო აქ არის ხოლმე, მის ქმართან ერთად ვარ. საკმაოდ დამოუკიდებელი ვარ, მაგრამ ყველაფერში ვერა.
დარია მამიდას გარეგნულადაც ძალიან ჰგავს, მას ნინო სუხიშვილის ახალგაზრდობისგან ფაქტობრივად ვერ გაარჩევთ.
დარიას წლების წინ სურდა მოცეკვავე გამხდარიყო, მაგრამ, როგორც ჩანს, ოჯახურ ტრადიციას ჯერჯერობით არ მიჰყვება, თუმცა, თბილისში ყოფნის დროს, სულ „სუხიშვილების“ რეპეტიციებზეა და ანსამბლთან ერთად გასტროლებზეც დადის.
„სცენის დიდი შიში მაქვს, როცა სცენაზე დგახარ, ძალიან ვნერვიულობ. ყოველთვის მაინტერესებდა ბალეტი, მაგრამ ვიცი, რომ მე ცალკე, როგორც დარია სუხიშვილი ვერ ვიარსებებ“, - განაცხადა დარიამ ზაფხულში თბილისში საკუთარ გამოფენაზე.
დარია სუხიშვილის პირველი გამოფენა ინდოელ ხალხს მიეძღვნა, ფოტოები ინდოეთში მამასთან ერთად გადაიღო.
ცეკვითა და ხელოვნებით გატაცებულმა დარიამ სცადა ინდოელი ხალხის მრავალფეროვნება, ცეკვა და კულტურა საკუთარ ფოტოებში აესახა. ყველაზე მეტად ის ინდოეთში ხალხის მხიარულმა განწყობამ მოხიბლა.
21 წლის დარია სუხიშვილი აპირებს მომავალში სხვა ქვეყნების ხალხის კულტურაც წარმოაჩინოს.
სექტემბერში დარია სუხიშვილმა ფლორენციის ხელოვნების სკოლაში ჩააბარა და სურს, არტი მისი ცხოვრების მთავარი ნაწილი გახდეს. რაც შეეხება ცეკვას - იმედი აქვს, მისი მომავალი სცენასაც დაუკავშირდება.
