ცხოვრება რომ მოულოდნელობებით არის სავსე და მას ვერ დაგეგმავ, ეს სიახლე არავისთვისაა.


სულ რამდენიმე დღის წინ ინტერნეტ სივრცეში დიდი გამოხმაურება მოჰყვა სიუჟეტს, საიდანაც გავიგეთ, რომ „მოამბის“ ყოფილი დიქტორი დავით სოკოლოვი ხანდაზმულთა ჰოსპიტალში ცხოვრობს.



დავით სოკოლოვი სიუჟეტში ყვება, რომ ის და მისი მეუღლე, რომელიც მძიმე ავადმყოფია, მოხუცთა ჰოსპისში 8 წელია ცხოვრობენ. ენატრება თავისი პროფესიით მუშაობა და ხშირად სიზმარშიც კი ხედავს, როგორ შედის სტუდიაში და გადაცემა მიჰყავს.

მოხუცთა თავშესაფარში სხვადასხვა დროს არაერთი სახელოვანი და გამოჩენილი ქართველი მოხვდა.

„რეიტინგი“ სწორედ მათ შესახებ გიამბობთ.



ოთხი წელი დიდ სცენაზე იდგა. ქუჩაში ცნობდნენ, ეფერებოდნენ. სუხიშვილების ყოფილი მოცეკვავე, 81 წლის ლამარა მახარაშვილი დღეს ხანდაზმულთა პანსიონატში ცხოვრობს.

შვილის დაღუპვის შემდეგ თვითმკვლელობა ბევრჯერ სცადა, ალკოჰოლსაც მიეძალა. შინიდან გაპარულს ბიჭის საფლავზე პოულობდნენ. მტკვარში გადახტა, მაგრამ გადაარჩინეს. მისივე თქმით, იგი არ ფიქრობდა, რომ მეორე შვილსაც სჭირდებოდა. მისი ქალიშვილი პროფესიით ექიმია და ამჟამად ამერიკაშია, რომელიც ასევე ძალიან ახალგაზრდა დაქვრივდა, პატარა შვილები დარჩა.
არაჩვეულებრივი რძალი და შვილიშვილი ჰყავს. ისინი არიან მისი ნუგეში და ცხოვრების აზრი. მეუღლე ნაადრევად გარდაეცვალა.

ყოფილი მოცეკვავის ოჯახს კარგად იცნობდნენ, ამიტომ ხანდაზმულთა პანსიონატში დასაქმება შესთავაზეს. თავიდან უარი უთხრა, არ ჰქონდა მუშაობის თავი, მაგრამ ისე მოეწონა იქაურობა, დარჩენა გადაწყვიტა. აჩვენეს ოთახი, სადაც ახლა ცხოვრობს და დარჩა, თუმცა,  ქალიშვილმა შინ წაიყვანა, მაგრამ ისევ უკან დაბრუნდა. ეს მისი მეორე სახლია. ნატრობს მისი თაობის მოცეკვავეებს ხშირად შეხვდეს. ისინი ბევრ რამეს ახსენებენ...

შვილის დაღუპვის შემდეგ აღარ უცეკვია. დიდი ხანია, ყვავილებსაც აღარავინ ჩუქნის. ამბობს შვილმკვდარ დედას რაღა მაცეკვებსო? თუმცა, მუსიკა როცა ესმის, ფეხები მექანიკურად ჰყვება ტემპს, მაგრამ გული არ აძლევს ცეკვის უფლებას, ასე ჰგონია, ხელებს ვეღარ გაშლის... ცეკვა, რომელიც მისი ცხოვრების განუყოფელი ნაწილი იყო, აღარ შესრულდება...






დონატა პანჩენკო რამდენიმე წელიწადია თემქის ხანდაზმულთა პანსიონატში ცხოვრობს. ერთ დროს, მისი ცხოვრება რადიკალურად განსხვავებული იყო. ის ქართული ანიმაციის ერთ-ერთი პიონერია. “წუნა და წრუწუნას” ანიმატორი ახლა მოხუცთა თავშესაფარში ცხოვრობს და ამბობს, რომ სრულიად მარტოა.