ბავშვობაში ყველა გოგონა თეთრ ფუშფუშა საქორწინო კაბაზე ოცნებობს. გადის წლები და გემოვნების ცვლილებასთან ერთად წარმოსახვაში იცვლება კაბის დიზაინიც. ბოლოს კი დგება ნანატრი დღე, რომლის სრულყოფასაც ბევრი შრომა, წვალება და დიდი იმედები ახლავს თან. როგორც წესი, ყველაფერი ზღაპრულად სრულდება, თუმცა, პატარძლები კიდევ დიდხანს ამახსოვრდებათ, 2017 წელს 1 დღით თვალისმომჭრელ დედოფლებად ცნობადი სახეები და მათი მეუღლეები იქცნენ. უფრო მეტიც, მათმა დაქორწინებამ ლამის პოლიტიკური მოვლენები გადაფარა.


დიზაინერ მაკა ასათიანის უფროსი ვაჟი კახი ჟორდანია ულამაზეს ნანიკო კლდიაშვილზე დაქორწინდა. წყვილი ორი წლის წინ დაინიშნა, ახლა კი ჯვარი ქაშუეთის ეკლესიაში დაიწერეს და ქორწილი გადაიხადეს. ქალაქში ბევრს საუბრობდნენ პატარძლის ზღაპრულ კაბაზე და ყველა ერთად აღნიშნავდა, რომ დედოფალი მართლაც გრაციოზულად გამოიყურებოდა. ქორწილში ბევრ ცნობილ სახეს შეხვდებოდით, მათ შორის ხათუნა ჟორდანიას, ნინი ქარსელაძესა და ბახვა ბრეგვაძეს.

წლის ყველაზე გახმაურებული ქორწილი ინგა გრიგოლიას ქალიშვილმა გადაიხადა. მარიამ გრიგოლია ნიკოლოზ გამეზარდაშვილზე დაქორწინდა. მას საქორწინო კაბა ანუკი არეშიძემ შეუკერა. ყველასთვის საყვარელი მარიამი საკურთხეველთან დედამ მიიყვანა. მარიამისა და ნიკოლოზის ქორწილში უამრავმა ცნობილმა ადამიანმა მოიყარა თავი, როგორც პოლიტიკიდან, ასევე შოუ-ბიზნესიდან, ისეთი ქორწილი იყო, რომელზეც ბევრი იოცნებებდა, თუმცა, ასეთი ქორწილის გადახდა და ასეთი სტუმრების დაპატიჟება ბევრს არ შეუძლია და იმის მაგივრად, რომ ჟურნალისტისთვის ქალიშვილის გაბედნიერება მიელოცათ, სოციალურ ქსელში ბევრმა ამის გამო ინგა გრიგოლიას კრიტიკა დაიწყო.

საქართველოში გადაიხადა ქორწილი სოფო ნიჟარაძის ბიძაშვილმა სალომე სვანაძემ. რუსეთში მცხოვრებმა, ცნობილმა პლასტიკურმა ქირურგმა, კანადელ ექსპერტზე იქორწინა და მთაწმინდაზე ისეთი ქორწილი გადაიხადა, რომელზეც პატარა გოგონები ჯერ კიდევ ბავშვობაში ოცნებობენ. სალომეს და ტიმის ურთიერთობა რამდენიმე წელს ითვლის.